Za zabojstva čałavieka asudžany 32-hadovy jehier Kobrynskaj rajonnaj struktury respublikanskaha dziaržaŭnaha hramadskaha abjadnańnia «Biełaruskaje tavarystva palaŭničych i rybałovaŭ».
Jak paviedamiła prakuror adździeła prakuratury Bresckaj vobłaści Viera Fiłončyk, viečaram 23 kastryčnika 2013 hod jehier byŭ na palavańni pad kiraŭnictvam kalehii ŭ lasnym masivie niedaloka ad vioski Čarniany Małaryckaha rajona. Zaŭvažyŭšy aŭtamabil «Aŭdzi», jaki jechaŭ va ŭročyšča, kiraŭnik palavańnia padavaŭ kiroŭcu znaki, kab toj spyniŭsia.
Kali aŭtamabilist praihnaravaŭ patrabavańnie i pradoŭžyŭ ruch, jehier, aburany pavodzinami kiroŭcy i žadajučy dapamahčy kalehu, vystraliŭ pa aŭtamabili z palaŭničaj strelby. U vyniku pasažyr «Aŭdzi» (žychar Małaryckaha rajona) ad atrymanaha ahniastrelnaha ranieńnia ŭ hałavu pamior na miescy zdareńnia.
Jehiera zatrymali, u dačynieńni da jaho raspačali kryminalnuju spravu.
Jak adznačyła Fiłončyk, padčas rasśledavańnia spravy i ŭ sudzie było ŭstanoŭlena, što jehier naŭmysna zrabiŭ prycelny vystrał u pasažyra «Aŭdzi», bo da hetaha bačyŭ kiroŭcu i pasažyra, kali śviaciŭ lichtarom u sałon aŭtamabila.
7 lipienia 2014 hoda sud Małaryckaha rajona pryznaŭ jehiera vinavatym va ŭčynieńni złačynstva, praduhledžanaha č. 1 art. 139 Kryminalnaha kodeksa (zabojstva), i pryhavaryŭ da šaści hadoŭ pazbaŭleńnia voli ŭ kałonii ŭzmocnienaha režymu z pazbaŭleńniem prava na palavańnie terminam na try hady.
Pavodle pryhavoru suda ź jaho spahnana 100 młn rubloŭ na karyść žonki zahinułaha i troch jaho niepaŭnaletnich dziaciej.
19 žniŭnia pryhavor nabyŭ zakonnuju moc. U hety dzień sudovaja kalehija pa kryminalnych spravach Bresckaha abłasnoha suda pakinuła kasacyjnuju skarhu mužčyny biez zadavalnieńnia. Jon prasiŭ pierakvalifikavać jaho dziejańni na pryčynieńnie śmierci pa nieaściarožnaści.
Raniej mužčyna sudzimy nie byŭ. Jon žychar adnaho ź sielskich nasielenych punktaŭ Kobrynskaha rajona.
