Pa spravie Viciebskaj brojlernaj ptuškafabryki źmieščany pad vartu siem čałaviek. Takaja infarmacyja abnarodavana ŭ prahramie «Panarama» telekanała «Biełaruś 1» viečaram 19 žniŭnia.
Pad vartaj znachodziacca hienieralny dyrektar pradpryjemstva, člen Savieta Respubliki Nacyjanalnaha schodu Biełarusi Hanna Šarejka, čatyry členy konkursnaj kamisii i dva kampańjony-pastaŭščyki.
Kryminalnaja sprava ŭ dačynieńni da šerahu słužbovych asob AAT «Viciebskaja brojlernaja ptuškafabryka» pa faktach złoŭžyvańnia imi słužbovymi paŭnamoctvami była raspačata Hienieralnaj prakuraturaj u červieni hetaha hoda. Ustanoŭlena, što jany na praciahu niekalkich hadoŭ, kali znachodzilisia ŭ składzie konkursnaj kamisii, prymali rašeńni pra zakupcy karmoŭ i karmavych dabavak u zamiežnaj kamiercyjnaj struktury pa zavyšanych cenach, što mieła vynikam pryčynieńnie ptuškafabrycy ŭronu ŭ sumie bolš jak 4 młrd rubloŭ, što ź`iaŭlajecca asabliva bujnym pamieram.
Pavodle danych Hienprakuratury, mienavita hiendyrektar Hanna Šarejka davała niezakonnyja ŭkazańni členam konkursnaj kamisii ab pryznańni pieramožcam konkursu adnoj z zamiežnych kampanij, z uładalnikam jakoj była ŭ siabroŭskich adnosinach.
U suviazi z tym što Šarejka ź`iaŭlajecca členam Savieta Respubliki, hienieralnym prakuroram na padstavie dziejnaha zakanadaŭstva ŭ vierchniuju pałatu była nakiravana pastanova ab davańni zhody na ažyćciaŭleńnie jaje kryminalnaha pieraśledu. Takaja zhoda była atrymana 14 žniŭnia, i ŭ hety dzień Šarejka była pryznana padazronaj va ŭčynieńni złačynstva, praduhledžanaha č. 3 art. 424 KK (złoŭžyvańnie słužbovymi paŭnamoctvami). Z sankcyi Hienieralnaj prakuratury 15 žniŭnia ŭ dačynieńni da Šarejki prymieniena miera strymańnia ŭ vyhladzie źmiaščeńnia pad vartu.
Ustanoŭlena, što ŭ vyniku niezakonnych dziejańniaŭ Šarejka ŭ karotkija terminy pabudavała darahi katedž płoščaj 240 kv. mietraŭ, nabyła darahuju bytavuju i elektronnuju techniku, zabiaśpiečyła sabie materyjalny dabrabyt u budučyni.
