Bolšaść hramadzian Venesueły prahałasavali suprać kanstytucyjnaj reformy prezydenta krainy Uha Čavesa, što musiła značna pašyryć prezydenckija paŭnamoctvy. Pavodle źviestak Nacyjanalnaj vybarčaj rady Venesueły paśla padliku 90 % biuleteniaŭ, 50,7 % venesuelcaŭ nie padtrymali adpaviednyja papraŭki ŭ kanstytucyju Venesueły.
U niadzielu, 2 śniežnia, u Venesuele adbyŭsia referendum, padčas jakoha hramadzianie krainy vyrazili svajo staŭleńnie da źmienaŭ kanstytucyi, prapanoŭvanych prezydentam Čavesam. U pryvatnaści, prapanovu admianić abmiežavańnie na kolkaść terminaŭ adnaho čałavieka na pasadzie prezydenta, padtrymali 49,29 % udzielnikaŭ. Naahuł prezydent prapanavaŭ unieści ŭ kanstytucyju krainy 33 źmieny.
Siarod inšaha, mierkavałasia addać pad kantrol prezydenta centralny bank, stvaryć novyja pravincyi, jakija musili padnačalvacca centru, i źmienšyć pravy miascovaha samakiravańnia.
Čaves taksama prapanavaŭ skaracić pracoŭny dzień da šaści hadzin i abvieścić 16 hadoŭ uzrostam, jaki daje prava na ŭdzieł u vybarach.