Chočaš razmachvać zbrojaj — razmachvaj. Spaborničaj ź inšymi, pakažy svaju siłu. Pryšpili hieorhijeŭskuju stužačku i prasłuchaj lekcyi pra moc Savieckaha Sajuza, pahrozu NATA i tupavatych palitykaŭ z tvajoj ułasnaj krainy. Tak vučyli litoŭskich ruskich — tak vučać i biełaruski Rumoł, i moładź z inšych padobnych arhanizacyj.
Tak u niekalkich frazach možna acharaktaryzavać łahier u Rasii, u jakim, miarkujučy pa infarmacyi ŭ ŚMI, niadaŭna praviała čas hrupa maładych ludziej ź Litvy, Łatvii i Estonii.
Idylija — hieraičnyja dzieci z Kijeva
U žniŭni ŭ Kirhizii prajšło mierapryjemstva «Sajuz 2014 — Naščadki Pieramohi». Nazva pra mnohaje havoryć. Jašče bolš havorać arhanizatary mierapryjemstva.
Łahier «Naščadkaŭ Pieramohi» charaktaryzujecca jak «mižnarodny moładzievy adukacyjny zbor vajenna-spartyŭnych arhanizacyj i kadeckich karpusoŭ». Jak piša «Russkaja hazieta», prajekt na samoj spravie «hieapalityčny». Adzin z prykładaŭ — apisanaja ŭ haziecie historyja, jak udałosia pryvieźci ŭ łahier junakoŭ z Małdovy, i jany «ŭstali ŭ adzin stroj z adnahodkami z Prydniastroŭja».
Asobny epizod u publikacyi haziety pryśviečany dzieciam z Ukrainy, jakich nibyta pryvieźli z Kijeva dźvie nastaŭnicy, jakija ździejśnili «hieraičny ŭčynak». Ukrainskija dzieci pakazali, što «jany naščadki voinaŭ-pieramožcaŭ, a nie palicajaŭ i lasnych bandytaŭ».
Hazieta piša, što ź ciažkaściu ŭdałosia pryvieźci i dziaciej z krain Bałtyi. Praŭda, pierad hetym nahadvaje ab pazicyjach Litvy, Łatvii i Estonii na mižnarodnaj arenie.
«Prybałtyka demanstratyŭna ŭstaje na bok NATA va ŭsim, što nakiravana suprać Rasii. Navat kali heta škodzić jaje nacyjanalnym i ekanamičnym intaresam. Niahledziačy na heta, užo niekalki hadoŭ zapar na zbory «Sajuz» pryjazdžajuć kamandy navučencaŭ z Łatvii, Litvy i Estonii. Heta stała mahčymym dziakujučy adnamu čałavieku — Siarhieju Ivansu», — piša «Ruskaja hazieta», jakaja nazyvaje hramadzianina Łatvii Ivansa «byłym desantnikam, «afhancam» (…) i nieabyjakavym čałaviekam». U haziecie śćviardžajecca, što Ivansa navat sprabavali pryciahnuć da kryminalnaj adkaznaści za toje, što «pad prykryćciom «Sajuza» u Rasii rychtujuć maładych dyviersantaŭ».
Prahrama: stralba, spabornictvy, lekcyi ab słavutym savieckim minułym
U liku novaŭviadzieńniaŭ łahiera «Russkaja hazieta» zhadvaje, naprykład, «spabornictvy pa taktyčnaj śpiecpadrychtoŭcy, charakternyja dla śpiecpadraździaleńniaŭ armii».
Stralali nibyta ź pnieŭmatyčnaj zbroi, ale spabornictvami pa stralbie kiravali «sapraŭdnyja prafiesijanały»: aficery atrada «Alfa».
Hazieta apisvaje ŭvieś śpiektr dziejnaści łahiera. U tym liku — lekcyi zasnavalnika prapahandysckaha kanała ANNA-news Marata Musina pra «žurnalisckuju minuŭščynu ŭ Livii, Siryi, kijeŭskim Majdanie i na paŭdniovym uschodzie Ukrainy».
Partał news-asia.ru cytuje zajavu Musina, u jakim šmat nastalhii pa savieckim časie, antyzachodnich łozunhaŭ, aktyŭnaj ahitacyi moładzi z zaklikami dziejničać u svaich krainach.
«Realnaść takaja, što Amieryka nie admaŭlajecca ad zapłanavanych dziejańniaŭ. Pytańnie kansalidacyi aktualnaje, byłyja krainy SSSR pavinny zachavać adzinstva. Ciapier my bačym, jak pałaje Ukraina — naša bratniaja kraina, i viedajem, chto za hetym staić.
U toj ža čas, vajenna-patryjatyčnaje, internacyjanalnaje vychavańnie ŭ bolšaści byłych savieckich krain zastajecca za bortam. Hetaj pracaj zajmajucca altruisty. Ja liču, što ŭkład kožnaha z vas nie dazvolić patencyjnaj niebiaśpiecy raspaŭsiudzicca va ŭsich respublikach, stanie procivahaj raspalvańniu varožaści», — cytuje pramovu prapahandysta news-asia.ru.
Ideałohija, zasnavanaja na «Internacyjanale». Znajoma?
Nie škaduje chvały łahieru «Sajuz» i news-asia.ru. Adzin z arhanizataraŭ łahiera — były instruktar śpiecpadraździaleńnia, a ciapier «paśpiachovy rasijski biznesmen» Aleh Bakanač adkryta raspavioŭ, što meta «Sajuza» — abudžeńnie savieckaha duchu ŭ ruskamoŭnaj moładzi z krain byłoha SSSR.
«Paśla raspadu Savieckaha Sajuza stała vidać, što zdabyŭšy niezaležnaść, respubliki pajšli šlacham rehresu, pačali addalacca adna ad adnoj. Tady i naradziłasia ideja arhanizavać vajenna-patryjatyčnyja zbory, jakija mahli b abjadnoŭvać našu moładź pad ahulnaj idejaj internacyjanalizmu», — skazaŭ Bakanač.
Jak pierałomny momant news-asia.ru vyłučaje łahier 2010 hoda, u jakim było vyrašana źmianić praviły — u vajenna-patryjatyčnych spabornictvach udzielničali ŭžo nie kamandy asobnych krain: maładyja ludzi ŭžo čaćviorty hod raźmiarkoŭvajucca ŭ «internacyjanalnyja» častki.
«Ciapier u kožnym atradzie pradstaŭniki ŭsich respublik. Niama duchu supiernictva, niama dziaržaŭnaha abo nacyjanalnaha supraćstajańnia», — ciešycca hałoŭny arbitr spabornictvaŭ, hieroj Rasii Saližan Šarypaŭ.
Na partale aścierahajucca, što dzieci z łahiera, viarnuŭšysia ŭ krainy Bałtyi, buduć pieraśledvacca. «Nieviadoma, jak sustrenuć u hetym hodzie svaich kadetaŭ Łatvija, Litva, Estonija, Małdova i Ukraina. Miarkujučy pa tym, što kiraŭnikam kamand daviałosia vyvozić dziaciej abchodnymi šlachami, pryjom naŭrad ci budzie ciopłym», — pałochaje news-asia.ru.
Taksama ŭ publikacyi cytujecca nibyta pražyvaje ŭ Litvie Raman Abramaŭ. «Hety prajekt vielmi važny, asabliva dla krain Prybałtyki. Za apošni čas u nas u Litvie znoŭ ŭzmacnilisia nacyjanalistyčnyja nastroi. (…) U rehijonach našaj krainy žychary dumajuć, što voś-voś i pačniecca vajna z Rasijaj. Tut našy dzieci bačać usio na svaje vočy, vučacca vyrašać prablemy razam i sumiesna pieraadolvać usie ciažkaści», — śćviardžaje Abramaŭ.
Malukiavičus: niebiaśpieka surjoznaja
Vykładčyk Instytuta mižnarodnych adnosinaŭ i palityčnych navuk Nieryjus Malukiavičius skazaŭ, što «Sajuz» sprabuje raspaŭsiudžvać ideałohiju Maskvy.
«Pahroza — heta nie tolki Pucin i jaho asiarodździe. Pahroza — heta peŭnaja ekstremisckaja ideałohija. Ideałohija «Ruskaha śvietu», ci jak jaje ni nazaviem, na padstavie jakoj nie tolki sprabujuć pryciahnuć simpatyi, ale i viarbujuć moładź dla niejkich ahresiŭnych dziejańniaŭ», — skazaŭ Malukiavičus.
Pavodle jaho słoŭ, mienavita psichałahičnaja apracoŭka maładych ludziej moža być vielmi škodnaj. «Pierš za ŭsio, pramyvajucca mazhi. I tady ludzi iduć na śmierć dziela idei», — skazaŭ jon.
