Heta zdaryłasia na turniry Topking World Series, jaki tranślavaŭsia na 170 krain śvietu. Dźmitryj i Maryja Valenty vychodzili bicca ŭ biełaruskich vyšyvankach.
Dvuboi prajšli 13 vieraśnia ŭ Minsku, choć byli aryjentavanyja pieravažna na azijackija krainy. Było zajaŭlena, što tolki ŭ Kitai aŭdytoryja telehledačoŭ skłała kala… 300 miljonaŭ čałaviek.
U ścienach Biełdziaržcyrka vystupiŭ samy raśpijarany bajec muaj-taj śvietu Buakaŭ, a taksama try hieroi prajekta «Bajcoŭski hien»: Andrej Kulebin, Dźmitryj Valent i haradzieniec Dźmitryj Varac. U jakaści haściej i siekundantaŭ na bajcoŭskim šou prysutničali Vital Hurkoŭ i znakamity italjaniec Džordžya Pietrasian. Sudzili bai zamiežnyja sudździ. Sapiernikaŭ biełarusam pryvieźli nadzvyčaj mocnych — čempijonaŭ samaha prestyžnaha tajskaha stadyjona Lumpini. Absłuhoŭvali pajadynki zamiežnyja sudździ i refiery.
Losavańnie źviało našaha Andreja Kulebina z nadziejaj iranskaha muaj-taj Ejza Ałamda Niazamam. U pieršym raŭndzie zorny biełarus mieŭ peŭnyja prablemy, u druhim raspačaŭ ahresiŭny nastup i ŭrešcie nakaŭtavaŭ iranca ŭdaram pa ściahnie (łoŭ-kikam). Takim čynam, Andrej vyjšaŭ u nastupny etap turnira Topking World Series, jaki adbudziecca u Hankonhu.
— U pačatku boju ja prapuściŭ łokać nasustrač, tamu spačatku pryhladaŭsia, nie chacieŭ ryzykavać. Jon biŭ niestandartna, razmašysta. A potym, kali sapiernik prytamiŭsia, pačaŭ brać svajo. Byli dobryja padkazki z majho kuta. Usio pačało vydatna atrymlivacca. Heta novaja dla mianie vahavaja katehoryja (70 kh). Budu rychtavacca da nastupnaha etapu, da mocnych udaraŭ u hetaj katehoryi treba pryzvyčajvacca.
Haradzieniec Dźmitryj Varac (63 kh) vyjšaŭ baksiravać suprać čempijona stadyjona Lumpini Ranhravi. Tajski sapiernik, źbiantežany habarytami biełarusa i jaho piśmiennaj rabotaj, tak i nie zmoh trapić u zonu kamfortu. U pieršym ža raŭndzie Dźmitryj streliŭ svajoj firmovaj napracoŭkaj: biez zamachu trapiŭ chaj-kikam u skivicu Ranhravi. U vyniku — brutalny nakaŭt.
— Naŭmysna rychtavali hety ŭdar pad Ranhravi. Heta viadomy bajec, i ŭ internecie chapała videazapisaŭ jaho vystupleńniaŭ, — raskazaŭ Dźmitryj Varac adrazu paśla pajadynku. — My z trenieram praanalizavali videa, vyjavili słabyja baki sapiernika i spadziavalisia albo na ŭdar pravym kalenam, albo na chaj-kik u hałavu. Tak jano i vyjšła.
Dźmitryj Valent (77 kh) zmahaŭsia suprać tajca Panoma. U pieršym raŭndzie biełarus natrapiŭ na sustrečny łokać i atrymaŭ ciažkaje raśsiačeńnie. U luby momant dvuboj mahli spynić. Ale ŭ druhim raŭndzie Valent fiejeryčna vyklučyŭ Panoma levym sustrečnym. Heta ciažka apisvać. Na heta varta pahladzieć.
— Raśsiačeńnie łokciem atrymaŭ, kali palacieŭ napierad z apuščanaj rukoj. Vyciraŭ kroŭ rukoj i, u pryncypie, kantralavaŭ sapiernika. Vielmi chaciełasia pieramahčy, — dzielicca ŭražańniami Dźmitryj. — Spadziajusia, što dam rady hetaj traŭmie i praz tydzień zmahu pajechać u składzie nacyjanalnaj zbornaj na čempijanat Jeŭropy.
Dadamo, što na rynh Dźmitryj vyjšaŭ u biełaruskaj vyšyvancy. Zrešty, jak i jaho žonka Maryja, jakaja ŭ roŭnym dvuboi sastupiła kitajancy.
Ščyra vinšujem usich biełarusaŭ!
Hety bajcoŭski viečar uvojdzie ŭ historyju našaha sportu. Paviedamim i pra toje, što ŭ Brazilii biełaruski bajec MMA Andrej Arłoŭski siensacyjna nakaŭtavaŭ topavaha Antonia Silvu i viarnuŭsia na viaršyni suśvietnych rejtynhaŭ.
***
«Bajcoŭski hien» — prajekt kampanii «Budźma biełarusami!», meta jakoha — paznajomić hramadstva z našymi vybitnymi spartoŭcami! Časta ich lepš viedajuć za miažoj, čym doma. A biełaruskija spartoŭcy majuć unikalny los, varty ŭvasableńnia ŭ filmach, knihach, pieśniach dy prymaŭkach. Jany — nośbity biełaruskaha bajcoŭskaha hienu — hatovyja zaciata bicca za honar našaj krainy i kožnaha biełarusa. Znajomciesia bližej, hanaryciesia imi, zaŭziejcie za našych!
