Niedabudavany vytvorčy korpus AAT «Intehrał» — kirujučaja kampanija chołdynha «Intehrał» na vuł. Kazinca ŭ Minsku vystaviać na aŭkcyjon. Ab hetym paviedamili ŭ pres-słužbie biełaruskaha ŭrada.
Zhodna z pastanovaj Savieta Ministraŭ ad 12 vieraśnia numar 879, da 1 krasavika 2015 hoda padlahaje prodažu na aŭkcyjonie niezavieršany niezakansiervavany kapitalny budynak vytvorčaha korpusa «Kamplekt 1-EH». Rynačny košt abjekta na 21 krasavika 2014 hoda — Br22,3 młrd. Na aŭkcyjonie pačatkovaja cana pavinna być ustanoŭlena nie nižej za 80 pracentaŭ ad rynačnaha koštu.
Da 1 śniežnia biahučaha hoda pavinien adbycca aŭkcyjon pa prodažy pamiaškańnia, jakoje naležyć «Intehrału» i raźmieščana taksama na vuł. Kazinca ŭ stalicy. Rynačny košt na 9 śniežnia 2013 hoda składaje Br9,9 młrd. U adpaviednaści z pastanovaj pačatkovaja cana na aŭkcyjonie pavinna być ustanoŭlena nie nižej za nazvany rynačny košt. Kali tarhi buduć pryznany nierezultatyŭnymi, to canu možna budzie źnizić na 20 pracentaŭ.
Akramia taho, u pastanovie prapisana, što da 1 krasavika 2015 hoda pavinna być pradadziena niekatoraja majomaść AAT «Kirujučaja kampanija chołdynha «Haryzont». Razmova idzie ab kapitalnych budynkach u Minsku, ahulny rynačny košt jakich składaje Br9,7 młrd. U dakumiencie taksama skazana, što da 1 lutaha 2015 hoda adbudziecca aŭkcyjon pa prodažy pamiaškańnia (raźmieščanaha na vuł. Anharskaj u Minsku), jakoje znachodzicca va ŭłasnaści Biełarusbanka. Pačatkovaja cana na aŭkcyjonie — Br5,2 młrd.
Ministerstvu pramysłovaści, Biełarusbanku daručana pryniać miery pa realizacyi pastanovy Savieta Ministraŭ ad 12 vieraśnia numar 879.
