Sioleta ŭ Minsku budzie ŭstanoŭlena 1,5 tys. kantejnieraŭ dla paasobnaha zboru bytavych adchodaŭ, paviedamiła na pres-kanfierencyi 17 vieraśnia namieśnik hienieralnaha dyrektara DA «Minskaja haradskaja žyllovaja haspadarka» Halina Hilevič.
Pavodle jaje słoŭ, u Minsku ŭžo niekalki hadoŭ pravodzicca praca pa paasobnym zbory kamunalnych adchodaŭ. «Vy bačycie kalarovyja kantejniery na dvarovych terytoryjach dla zboru škła, płastyku i makułatury. Užo ŭstanoŭlena 12 tysiač takich kantejnieraŭ», — skazała Hilevič.
Płanujecca nabyć dadatkova dva aŭtamabili dla svoječasovaha vyvazu adchodaŭ, sabranych paasobna. Taksama na pradpryjemstvie «Ekares» płanujecca ŭstanavić jašče dźvie linii sartavańnia, na jakich buduć apracoŭvacca paasobna sabranyja nasielnictvam adchody.
Pavodle jaje słoŭ, letaś u Minsku sabrana 780 tys. ton bytavych adchodaŭ. «Heta prablema surjoznaja i z punktu hledžańnia ekanomiki, i ekałohii, i sacyjalnaj. Jana nie moža vyrašacca adnaboka, a tolki kompleksna. Nasielnictva pavinna razumieć, što niebiaźmiežnyja mahčymaści luboj dziaržavy ŭ płanie resursaŭ, my pavinny ekanomić i ŭ pobycie, i na vytvorčaści. Vučebnyja i infarmacyjnyja prahramy pavinny pačynacca sa školnaha ŭzrostu, kab heta było ŭžo na ŭzroŭni śviadomaści, što adchody treba sartavać i potym vykidvać u adpaviednyja kantejniery», — ličyć Hilevič. Jana, u pryvatnaści, raić dla ekanomii prastory kantejnieraŭ u płastykavych butelek adkručvać korki i ich źminać, a taksama źminać kardon. «Vyvaz hetych adchodaŭ ažyćciaŭlajecca dva razy na tydzień, što ekanamična apraŭdana», — rastłumačyła jana.
Hilevič taksama paviedamiła, što ŽREA davodziać płany pa zbory druhasnaj syraviny. «My taksama pracujem z rabočymi pa kompleksnaj uborcy, jakija źbirajuć adchody i zdajuć ich na pierasoŭnyja pryjomnyja punkty. Takim čynam jany za vosiem miesiacaŭ atrymali da zarpłaty dadatkova kala 20 młn. rubloŭ. Ja liču, što takuju pracu žyllovyja arhanizacyi pavinny raźvivać jak krynicu dadatkovych dachodaŭ dla ludziej, jakija majuć nievysokuju zarpłatu», — adznačyła Hilevič.
