Staršynia Rady BNR Ivonka Surviła pryvitała prezydenta Ŭkrainy Piatra Parašenku ŭ Atavie ŭ časie naviedvańnia im kanadskaha parlamentu.
Kiraŭnik Ŭkrainy naviedaŭ Kanadu pierad vizytam u Złučanyja Štaty, i paśla vystupu ŭ parlamencie jaho pryvitali pradstaŭniki dyjaspar. Pieršaj słova było dadziena staršyni Rady BNR Ivoncy Survile, jakuju radyjo «Svaboda» paprasiła raspavieści pra sustreču.
Surviła: «Dla ŭkraincaŭ heta była vialikaja padzieja i dumaju, što i dla samoha prezydenta, jakoha pryniali vielmi ciopła. Zrabili heta vielmi ŭračysta, było šmat ludziej, šmat ściahoŭ pierad parlamentam, i siarod ich — naš bieł-čyrvona-bieły. Paśla pramovy Parašenki ŭ parlamencie pradstaŭnikoŭ dyjasparaŭ zaprasili skazać paru słoŭ, miž inšym, mianie taksama. Ja pryvitała jaho ŭ Kanadzie i padziakavała ŭkrainskamu narodu za zmahańnie, jakoje važnaje taksama dla Biełarusi. Havaryŭ pradstaŭnik Estonii, vielmi dobra vystupiŭ pradstaŭnik krymskich tataraŭ, jaki skazaŭ, što Krym budzie zaŭsiody ŭkrainskim. Što ja zaŭvažyła — i heta tyčycca nia tolki sustrečy z Parašenkam — ŭkraincy adsunuli ŭ bok usie svaje sprečki i svarki, i ciapier adčuvajecca absalutnaja zhoda i supracoŭnictva miž saboj».
Ivonka Surviła taksama pieradała prezydentu Piatru Parašenku niadaŭniuju Zajavu Rady BNR ŭ spravie Ŭkrainy.
Tekst vystupu Staršyni Rady BNR Ivonki Surviły na ŭračystaści z nahnody vizytu prezydenta Ŭkrainy Piatra Parašenki:
Spadaru Prezydent,
Ja ščaślivaja Vitać Vas u hetaj cudoŭnaj krainie ad imia maich surodzičaŭ-biełarusaŭ.
Ad imia Rady Biełaruskaj Narodnaj Respubliki ŭ vyhnańni, chacieła b vykazać našuju salidarnaść i našu padtrymku narodu, uradu i vajskovamu kamandavańniu Ŭkrainy, jakija abaraniajuć nia tolki svaju ziamlu, ale i našyja supolnyja kaštoŭnaści ad brutalnaha ahresara.
My ŭdziačnyja Kanadzie za padtrymku Ŭkrainy i zaklikajem mižnarodnuju supolnaść akazać usiu mahčymuju dapamohu hetaj hieraičnaj nacyi. My razumiejem, što naša budučynia taksama zaležyć i ad taho, ci vytrymaje Ŭkraina vyprabavańni. My dziakujem narodu Ŭkrainy i žadajem vam pośpiechaŭ.
Žyvie Biełaruś!
Słava Ŭkrainie!
