Isnavańnie niezaležnaj demakratyčnaj Biełarusi z «ruskim śvietam» absalutna niesumiaščalnaje, zajaviŭ hramadski dziejač Vacłaŭ Areška na pasiadžeńni kruhłaha stała «Hramadzianskaja supolnaść na abaronie cyvilizacyjna-kulturnaj identyčnaści Biełarusi», arhanizavanaha 18 vieraśnia ŭ Minsku Asamblejaj demakratyčnych niaŭradavych arhanizacyj.
«Siońnia ačahi «ruskaha śvietu» ŭ biełaruskim hramadstvie źjaŭlajucca hałoŭnaj pieraškodaj dla lubych demakratyčnych pieraŭtvareńniaŭ», — ličyć Areška.
Pavodle jaho mierkavańni, «ruski śviet» stvaraje istotnyja pahrozy nie tolki biełaruskaj movie i kultury, ale i ŭ cełym fizičnamu isnavańniu biełaruskaj dziaržavy i nacyi.
Pry hetym jon adznačyŭ, što siońnia «praktyčna niama miechanizmaŭ procidziejańnia narastajučaj ekspansii hetaj źjavy». «Nośbitam i ahitataram «ruskaha śvietu» apošnija hady ŭ Biełarusi byli ŭłada i Łukašenka. Mienavita jon pabudavaŭ dziaržaŭna-ekanamičnuju sistemu, jakaja poŭnaściu zaležyć ad Rasii. Mienavita jaho ŭłada adznačana sistematyčnym razbureńniem biełaruskaj movy i kultury, poŭnaj likvidacyjaj demakratyčnych instytutaŭ, pieraśledam palityčnych praciŭnikaŭ i inšadumcaŭ», — skazaŭ Areška.
Pry hetym jon ličyć, što «chitraja rytoryka i roznyja techničnyja pavaroty kursu ŭład nie pavinny ŭvodzić u zman». «Tolki biełaruskaje hramadstva, namahańni roznych siektaraŭ hramadzianskaj supolnaści zmohuć pakłaści zasłon «ruskamu śvietu», — adznačyŭ Areška.
Hramadski dziejač ličyć, što Biełaruś nieabchodna zachavać častkaj jeŭraatłantyčnaj cyvilizacyi. «Niama treciaha biełaruskaha šlachu: my možam być ci na Uschodzie, ci na Zachadzie, inšaha nie atrymajecca. Kali Jeŭropa budzie z mocnaj niezaležnaj Ukrainaj — heta inšaja Jeŭropa. Heta, u pierśpiektyvie, naša Jeŭropa, dzie krainy, jakija lažać pamiž Čornym moram i Bałtykaj stvarajuć novy ŭpłyvovy rehijon», — skazaŭ jon.
