55-hadovy biełaruski śpiecyjalist Leanid Kučuk adchileny ad pasady hałoŭnaha treniera maskoŭskaha «Łakamatyva».
Rašeńnie pryniata pa vynikach pasiadžeńnia savieta dyrektaraŭ kłuba, jakoje prajšło 17 vieraśnia. «Členy savieta dyrektaraŭ adznačyli, što dla kamandy byli stvorany ŭsie ŭmovy, nieabchodnyja dla jakasnaj padrychtoŭki da siezona. Kamanda ŭkamplektavana vysokakvalifikavanymi futbalistami. U takoj situacyi adkaznaść za niezdavalniajučy vynik vystupleńnia kamandy pavinna być uskładziena na hałoŭnaha treniera. Hałoŭny trenier zaŭsiody źjaŭlajecca adkaznym za vynik vystupleńnia kamandy», — havorycca ŭ zajavie savieta dyrektaraŭ.
Pavodle mierkavańni prezidenta «Łakamatyva» Volhi Smarodskaj, Kučuk straciŭ kantrol nad kamandaj. «Łakamatyŭ» nie zmoh vyjści ŭ hrupavy raŭnd Lihi Jeŭropy, a ŭ čempijanacie Rasii zajmaje tolki dziaviataje miesca.
U minułym siezonie kamanda zavajavała bronzavyja miedali čempijanatu krainy, adnak upuściła šans padniacca vyšej i vystupić u Lizie čempijonaŭ z-za biazvolnaha paražeńnia «Rastovu» na finišy čempijanatu, zajaviła Smarodskaja ITAR-TASS.
Kantrakt z Kučukom moža być skasavany tolki pa zhodzie bakoŭ, tamu jurysty «Łakamatyva» šukajuć vychad ź situacyi ŭ suviazi z rašeńniem savieta dyrektaraŭ.
Pierad adchileńniem treniera na sajcie kłuba źjavilisia vykazvańni niekatorych hulcoŭ kamandy z krytykaj Kučuka.
Leanid Kučuk uznačaliŭ «Łakamatyŭ» u červieni 2013 hoda, paśla pierachodu z krasnadarskaj «Kubani».
