Fiederalnaja słužba pa vieterynarnym i fitasanitarnym nahladzie (Raśsielhasnahlad) moža abmiežavać impart pradukcyi šerahu rybnych i małočnych pradpryjemstvaŭ Biełarusi.
Pavodle słoŭ pamočnika kiraŭnika Raśsielhasnahlada Alaksieja Alaksiejenki, heta moža adbycca «z-za praparcyjanalnaha rostu ryzyk na fonie rezkaha pavieličeńnia pastavak ryby z Narviehii i małočnaj pradukcyi ź Litvy i Polščy ŭ Biełaruś».
«My pastavili na manitorynh pradukcyju šerahu biełaruskich pradpryjemstvaŭ. Kali ŭ nas buduć padstavy sumniavacca ŭ jaje biaśpiecy, viadoma ž, my prymiem svaje miery», — skazaŭ Alaksiejenka.
Jon rastłumačyŭ, što viedamstva nieadnarazova fiksavała mikrabijałahičnaje zabrudžvańnie ŭ małočnaj pradukcyi i pradukcyi rybahaspadarčaha kompleksu, jakija ruchalisia ź Biełarusi. Bo kolkaść hetaj pradukcyi na rasijskim rynku pavialičyłasia ŭ žniŭni—vieraśni 2014 hoda, praparcyjanalna vyraśli ryzyki raspaŭsiudžvańnia niedabrajakasnaj pradukcyi.
Alaksiejenka dadaŭ, što rasijskaje viedamstva maje mahčymaść uvodzić abmiežavańni na pastaŭki ŭ Rasiju pradukcyi pradpryjemstvaŭ Mytnaha sajuza. «My pavinny zabiaśpiečvać biaśpieku pradukcyi, adkul by jana nie pastupała», — skłaŭ jon.
Kiraŭnik Raśsielhasnahlada Siarhiej Dankviert zajaviŭ, što słužba maje namier uzmacnić manitorynh biełaruskaj pradukcyi z-za niezvyčajnaha rostu impartu małočnaj pradukcyi ź Litvy i Polščy i ryby z Narviehii ŭ respubliku ŭ vieraśni 2014 hoda suprać lipienia i žniŭnia 2014 hoda. Tak, pavodle danych viedamstva, za ŭvieś lipień 2014 hoda Biełaruś impartavała z Narviehii 1,1 tys. ton achałodžanaj i zamarožanaj ryby, a za 15 dzion vieraśnia — 2,5 tys. ton. Polšča ŭ lipieni 2014 hoda pastaviła ŭ respubliku 260 ton pasteryzavanych viarškoŭ, a z 1 pa 15 vieraśnia 3,5 tys. ton. Litva pačała impartavać u Biełaruś pasteryzavanyja viarški ŭ žniŭni 2014 hoda, a z 1 pa 15 vieraśnia abjom pastavak skłaŭ 264 tony. «Naša zadača, kali kalehi tak pavialičvajuć vytvorčaść, zrabić tak, kab heta było biaśpiečna», — skazaŭ Dankviert. Jon pradoŭžyŭ, što «rost impartu ryby i małočnaj pradukcyi ŭ Biełarusi nie źjaŭlajecca zvyčajnym ci siezonnym».
Kiraŭnik Raśsielhasnahlada adznačyŭ, što asnoŭnym pakupnikom małočnaj pradukcyi z Polščy ŭ vieraśni byŭ «Savuškin pradukt». Siarod biełaruskich rybnych kampanij, jakija rezka pavialičyli pastaŭki ryby, Dankviert vyłučyŭ Santa Bremor. Kali ŭ lipieni kampanija pastaviła ŭ Rasiju 752 tony achałodžanaj i zamarožanaj ryby i 324 tony file, to za 15 dzion vieraśnia hetyja pakazčyki ŭžo dasiahnuli 1,17 tys. ton i 712 ton adpaviedna.
