Reuters.com
Prezident Rasii Uładzimir Pucin u liście da svajho ŭkrainskaha kalehi Piatra Parašenki papiaredziŭ, što ŭ vypadku realizacyi handlovaha pahadnieńnia ź Jeŭrapiejskim sajuzam Maskva zakryje Kijevu dostup da svajho rynku.
Pra heta paviedamlaje Reuters sa spasyłkaj na list Pucina ad 17 vieraśnia.
Pavodle ahienctva, rasijski lidar napisaŭ, što navat źmieny ŭ zakanadaŭstva dla padrychtoŭki da pahadnieńnia ab asacyjavanym členstvie Ukrainy ŭ ES vyklikaje nieadkładny adkaz Maskvy.
«My pa-raniejšamu ličym, što tolki sistemnyja karekciroŭki Pahadnieńnia ab asacyjacyi, jakija prymajuć pad uvahu ŭvieś śpiektr ryzyk dla rasijska-ŭkrainskich ekanamičnych suviaziaŭ i ŭ cełym dla rasijskaj ekanomiki, dazvolać zachavać isnujučaje handlova-ekanamičnaje supracoŭnictva pamiž Rasijskaj Fiederacyjaj i Ukrainaj»,— cytuje Reuters list Pucina.
Pres-sakratar Kramla Dźmitryj Piaskoŭ u hutarcy z RBK nie paćvierdziŭ, ale i nie abvierhnuŭ najaŭnaść takoha lista.
Na minułym tydni parłamienty Jeŭrasajuza i Ukrainy ratyfikavali pahadnieńnie ab asacyjacyi i svabodnym handli.
Napiaredadni ŭrad Rasii zajaviŭ, što ŭviadzie pošliny na pradukty z Ukrainy praź dziesiać dzion paśla implemientacyi jaje damovy ź ES.
Raniej premjer-ministr Dźmitryj Miadźviedzieŭ paviedamiŭ, što padpisaŭ pastanovu ab ŭviadzieńni pošlin dla tavaraŭ z Ukrainy. Jana ŭstupić u siłu, kali Kijeŭ pačnie ŭžyvać ekanamičnyja artykuły pahadnieńnia ab intehracyi ź ES raniej za ŭstanoŭleny termin (1 studzienia 2016).
