Były ministr zamiežnych spraŭ Polščy Radasłaŭ Sikorski siońnia byŭ abrany staršynioj nižniaj pałaty polskaha parłamienta — Siejma.
Za pryznačeńnie Sikorskaha na hetuju pasadu addali hałasy 233 deputaty pry 220 nieabchodnych dla pryniaćcia rašeńnia. Suprać Sikorskaha prahałasavali 143 deputaty i 62 ustrymalisia ad hałasavańnia.
«Dziakuju frakcyjam, jakija nie vyłučyli inšaha kandydata na maršałka (staršyni Siejma). Dziakuju tym, chto za mianie prahałasavaŭ i tych, chto jašče nie pavieryŭ u maju kandydaturu. Ja chaču zasłužyć davier dziejańniami, a nie pramovami», — skazaŭ novapryznačany staršynia hałoŭnaj zakanadaŭčaj pałaty polskaha parłamienta.
Jon źviarnuŭ uvahu, što palaki horš za ŭsio aceńvajuć dziejnaść Siejma z usich dziaržaŭnych orhanaŭ, adznačyŭšy, što heta śviedčyć pra toje, što vostryja dyskusii, jakija tut viaducca, nie vyklikajuć davieru hramadzian i heta treba źmianić.
«Atmaśfiera kanfrantacyi, jakaja tut panuje, nie tolki nie spryjaje stvareńniu zakonaŭ, ale taksama nie dadaje nam papularnaści. Heta dla kožnaha z nas pavinna stać padstavaj dla aŭtarefleksii. Padčas kožnaha svajho vystupu my pavinny pakazvać, što znachodzimsia tut, kab vyrašać, a nie stvarać prablemy», — adznačyŭ Sikorski, i dadaŭ, što daviarajuć Siejmu ŭsiaho 18% palakaŭ.
51-hadovy Sikorski pakinuŭ pasadu ministra zamiežnych spraŭ, jakuju jon zajmaŭ z vosieni 2007 hoda, u pačatku hetaha tydnia paśla pryznačeńnia novaha Kabinieta ministraŭ. Jon stvaraŭsia ŭ suviazi z pryznačeńniem papiaredniaha premjera Donalda Tuska staršynioj Savieta Jeŭrasajuza.
