Zakon ab «asablivym statusie» asobnych rajonaŭ Danieckaj i Łuhanskaj abłaściej budzie vykonvacca tolki pry ŭmovie praviadzieńnia vybaraŭ, uzhodnienych z Ukrainaj. Pra heta ŭ prahramie «Padziei» na telekanale «Ukraina» zajaviŭ vice-premjer pa rehijanalnaj palitycy Uładzimir Hrojsman.
«Zakon pačnie vykonvacca tady, kali na peŭnych terytoryjach źjavicca miascovaja ŭłada, jakaja budzie mieć paŭnamoctvy zajmacca terytoryjami. Novaja miascovaja ŭłada, u adpaviednaści z hetym zakonam i mirnym płanam prezidenta, dapamoža centralnaj uładzie prynieści na hetyja terytoryi mir, dapamoža navieści paradak ŭ adzinaj unitarnaj dziaržavie», — adznačyŭ Hrojsman.
Taksama vice-premjer dadaŭ, što vyzvalenyja terytoryi ŭschodnich abłaściej i «časova zaniatyja bajevikami» terytoryi nie buduć finansavacca adnolkava.
Hrojsman zapeŭniŭ, što terytoryi, padkantrolnyja ŭkrainskaj uładzie, buduć całkam finansavacca ŭ adpaviednaści ź dziejučym zakanadaŭstvam.
«Što ž tyčycca terytoryj z asablivym paradkam samakiravańnia, to dla ich buduć vyznačanyja admysłovyja miechanizmy, jakija zabiaśpiečać rašeńnie prablemy finansavańnia», — prainfarmavaŭ Hrojsman.
Asablivaści hetych śpiecyjalnych miechanizmaŭ Hrojsman nie ŭdakładniŭ.
Raniej daradca prezidenta Ihar Łucenka zajaŭlaŭ, što Ukraina nie budzie finansavać terytoryi «asablivaha statusu» Danbasa.
Raniej paviedamlałasia, što Kijeŭ prapanavaŭ Danbasu pravieści miascovyja vybary 9 listapada. Adnak kiraŭnictva terarystyčnaj «DNR» admaŭlaje mirnuju prapanovu i źbirajecca pravieści svaje «vybary» 2 listapada.
