Za 18 dzion vieraśnia biełaruski Minsielhascharč vydaŭ dazvoły na ŭvoz rekordnaj kolkaści małočnaj syraviny.
Jak padličyła «Naša Niva», Departamient vieterynarnaha i charčovaha nahladu za dva z pałovaju tydnia vydaŭ ajčynnym pradpryjemstvam dazvoły na impart da kanca 2014 hoda ažno 128 717 ton małaka, viarškoŭ i syrovatki (kody TN ZED Mytnaha sajuza 0401, 0402 i 0404). Dla paraŭnańnia: uvieś abjom impartu pa zhadanych vyšej kodach za siem miesiacaŭ biahučaha hoda skłaŭ 7 759 ton.
Pa vieraśnioŭskich zajaŭkach maje ŭvozicca pradukcyja amal vyklučna z krainaŭ ES. U śpis trapili Łatvija, Litva, Polšča, Francyja i Estonija. Tak, z terytoryi Litvy možna impartavać da 70 500 ton małočnych paŭfabrykataŭ, z Polščy – 32 500 ton, z Łatvii – 24 180 ton, z Estonii – 1 037 ton i z Francyi – 500 ton.
Arhanizacyjam roznych rehijonaŭ pašancavała nieadnolkava. Najpierš paščaściła mieć vialikija kvoty na impart zachodnim abłaściam. Pradpryjemstvam Bresckaj vobłaści z pačatku vieraśnia byŭ dazvoleny ŭvoz 49 000 ton małakapraduktaŭ, Viciebskaj vobłaści – 3 780 ton, Homielskaj vobłaści – 9 400 ton, Hrodzienskaj vobłaści – 34 000 ton, Minskaj vobłaści – 16 437 ton, Mahiloŭskaj vobłaści – 9 100 ton, Minska – 7 000 ton.
Siarod asobna ŭziatych atrymalnikaŭ hruzaŭ lidaram pa kolkaści adobranaha małočnaha impartu vystupaje ZAT «Savuškin produkt», jakoje svaje 32 500 ton źbirajecca vybrać zajaŭkami z terytoryi Polščy. Na druhim miescy pa kolkaści dazvolenaj da zavozu syraviny znachodzicca AAT «Małočnaja kampanija Navahrudskija dary». Kala 27 000 ton małočnaj pradukcyi pradpryjemstva płanuje impartavać z Łatvii dy Litvy. AAT «Baranavicki małočny kambinat» patencyjalna moža ŭvieźci ź Litvy da 14 000 ton.
Nastupnyja pazicyi ŭ rejtynhu imparcioraŭ raźmierkavalisia nastupnym čynam. AAT «Maładziečanski małočny kambinat» – 8 000 ton, AAT «Minski małočny zavod №1» – 7 000 ton, AAT «Babuškina krynka» – 6 600 ton, AAT «Turaŭski małočny kambinat» – 5 300 ton, TAA «Lidskaja krynka» – 4 000 ton, AAT «Miłkavita» – 3 800 ton, AAT «Zdravuška-miłk» – 3 700 ton, AAT «Pastaŭskim małočny zavod» – 2 500 ton, AAT «Słucki syrarobny kambinat» – 2 400 ton, ZAT «Borysaŭdziecśpiecpradukt» – 2 300 ton, SAAT «Lachavicki małočny zavod», STAA «Danon Škłoŭ», filijał «Smarhonskija małočnyja pradukty» – pa 2 000 ton, AAT «Hłybocki małočnakansiervavy kambinat» i STAA «Juniłakt» – pa 1 000 ton, AAT «Małočnyja horki» i STAA «Roskorm» – pa 500 ton, STAA «Biełsyr» – 300 ton, AAT «Lepielski małočna-kansiervavy kambinat» – 220 ton, PUHP «Jeŭrabiełbiznes» – 60 ton, TAA «Siehrieta» – 37 ton.
Varta zaŭvažyć, što amal va ŭsich vypadkach miescami zachoŭvańnia pradukcyi vyznačanyja składskija pamiaškańni samich imparcioraŭ.
Možna mierkavać, što paśla pierapracoŭki hetaja małočnaja pradukcyja maje zadavolić popyt rasijskaha rynku. Rasijskaje embarha zrabiła niemahčymymi pramyja pastaŭki małočki ź Jeŭrasajuza.
Niahledziačy na toje, što pierapracoŭka Biełaruśsiu jeŭrapiejskaj syraviny nie zabaronienaja, a Maskva vykazvała spadziavańni na zamiaščeńnie impartu ź Jeŭropy biełaruskim, pieratvareńnie Biełarusi ŭ chab dla pradukcyi jeŭrapiejskaj sielskaj haspadarki vyklikała niervoznaść u Raśsielhasnahladu. Učora jaho kiraŭnik Dankviert pahražaŭ poŭnaj zabaronaj na ŭvoz biełaruskaj miasnoj i małočnaj pradukcyi, abhruntoŭvajučy jaho nibyta znojdzienymi ŭ ich antybijotykami i bakteryjami.
