Minharvykankam prapanuje Ministerstvu žyllova-kamunalnaj haspadarki razhledzieć pytańnie ab pavyšeńni pieni za praterminoŭku kamunalnych płaciažoŭ.
Ab hetym siońnia na pasiadžeńni meryi, pryśviečanym mieram pa pavyšeńni efiektyŭnaści i ŭdaskanaleńni raboty pradpryjemstvaŭ žyllovaj haspadarki horada, paviedamiŭ pieršy namieśnik staršyni Minharvykankama Uładzimir Kucharaŭ.
«Rabota z tymi, chto svoječasova nie apłačvaje žyllova-kamunalnyja pasłuhi, u vyhladzie abchodaŭ, zvankoŭ, spahnańnia pieni za niesvoječasovuju apłatu ŭ pamiery 0,3% ad ahulnaj sumy, nie prynosić naležnaha vyniku. Z metaj uzmacnieńnia ŭździejańnia na niepłacielščykaŭ i skaračeńnia zapazyčanaści prosim Ministerstva žyllova-kamunalnaj haspadarki razhledzieć pytańnie ab pavyšeńni pamieru pieni za praterminoŭku ŭniasieńnia płaciažoŭ», — skazaŭ Uładzimir Kucharaŭ.
Jon adznačyŭ, što spahnańnie z nasielnictva zapazyčanaści za žyllova-kamunalnyja pasłuhi źjaŭlajecca vialikaj prablemaj. Na 1 vieraśnia biahučaha hoda zapazyčanaść u Minsku skłała Br7,7 młrd. Kolkaść asabovych rachunkaŭ z praterminavanaj zapazyčanaściu — 4,3%. Pavodle słoŭ Uładzimira Kucharava, horš u hetym pytańni iduć spravy ŭ Partyzanskim i Centralnym rajonach stalicy, lepš — u Maskoŭskim i Frunzienskim.
Z pačatku hoda ŭ sudy Minska na niepłacielščykaŭ pasłuh ŽKH padadzieny 91 isk, ź ich 35 — na vysialeńnie, 10 ź ich zadavoleny. Razam z tym, nazvanaja pracedura źjaŭlajecca praciahłaj pa časie, tamu nie ŭsie ŽREA dastatkova aktyŭna pracujuć u hetym napramku. «Analiz pakazvaje, što amal 90%daŭžnikoŭ nie apłačvajuć pasłuhi da troch miesiacaŭ. Heta značyć ludzi, jakija faktyčna majuć mahčymaść zapłacić, nie robiać heta z-za biazładnaści. I ŽREA davodzicca za košt ułasnych srodkaŭ pakryvać zapazyčanaść», — padkreśliŭ Uładzimir Kucharaŭ.
