Śledčy kamitet Rasii raspačaŭ kryminalnuju spravu ab hienacydzie ruskamoŭnaha nasielnictva na paŭdniovym uschodzie Ukrainy, paviedamiŭ pradstaŭnik viedamstva Uładzimir Markin.
Pavodle jaho słoŭ, na paŭdniovym uschodzie krainy, pačynajučy z krasavika 2014 hoda, pradstaŭniki palityčnaha i vajennaha kiraŭnictva Ukrainy addavali zahady, «nakiravanyja na poŭnaje źniščeńnie mienavita ruskamoŭnych hramadzian».
Markin taksama zajaviŭ, što nie mienš za 2,5 tysiačy žycharoŭ paŭdniovaha ŭschodu Ukrainy zahinuli ŭ vyniku vajennych dziejańniaŭ z prymianieńniem rakietnych sistem załpavaha ahniu nievybarčaha dziejańnia.
Jon dadaŭ, što ŭ vyniku bajavych dziejańniaŭ byli źniščanyja i razburanyja bolš za 500 žyłych damoŭ, balnic i škoł, a bolš za 300 tysiač žycharoŭ, «bajučysia za svajo žyćcio i zdaroŭje, vymušanyja byli pakinuć stałyja miescy svajho pražyvańnia i šukać prytułak na terytoryi Rasijskaj Fiederacyi».
«Heta prosta tryźnieńnie. Takoha rodu sprava źjaŭlajecca pijar-šumam, zroblenym admysłova dla taho, kab abhruntavać praviadzieńnie vybaraŭ na Danbasie, kab całkam adździalić Danbas ad Ukrainy.
Usio heta supadaje pa časie z zajavami, zroblenymi na minułym tydni, ab praviadzieńni vybaraŭ u tak zvany orhan kiravańnia Danieckaj i Łuhanskaj narodnych respublik», — zajaviŭ u adkaz daradca ministra ŭnutranych spraŭ Ukrainy Anton Hieraščanka ŭ intervju Bi-Bi-Si.
«Z hetaj ža metaj było abvieščana ab masavych pachavańniach mirnych žycharoŭ, jakich byccam by rasstrelvali pradstaŭniki ŭkrainskaj armii.
Heta tolki dadatak da pijar-šumu, abhruntavańnia taho, što tak zvanaja Navarosija adździalajecca ad Ukrainy», — dadaŭ jon.
Kijeŭ abvinavačvaje Maskvu ŭ vajennaj padtrymcy sieparatystaŭ samaabvieščanych Danieckaj i Łuhanskaj narodnych respublik.
Dobraachvotniki i złačyncy
U vieraśniovym dakładzie pravaabarončaj arhanizacyi Amnesty International, daśledčyki jakoj razmaŭlali ź vidavočcami, havorycca, što ŭ dziejańniach jak ŭkrainskaj armii, tak i jaje supiernika jość prykmiety ździajśnieńnia vajennych złačynstvaŭ.
Tak, niekatoryja ŭciekačy skardzilisia na nievybarčyja artyleryjskija abstreły z boku ŭkrainskaj armii.
Inšyja raspaviadali, što sieparatysty zabivali abo vykradali ich susiedziaŭ. Jość taksama śviedčańni anałahičnych dziejańniaŭ dobraachvotnickich farmiravańniaŭ, jakija dziejničali na baku ŭkrainskaj armii.
Amnesty International patrabuje ad Kijeva pravieści detalovaje rasśledavańnie, pry hetym pravaabaroncy zajaŭlajuć, što Maskva ŭdzielničaje va ŭzbrojenym kanflikcie va Ukrainie,
a, takim čynam, taksama niasie častku adkaznaści za vajskovyja złačynstvy suprać mirnych žycharoŭ.
Rasijski bok abviarhaje abvinavačvańni ŭ pramym vajennym ŭmiašańni, choć, jak zajaviŭ na dniach u intervju telekanału Bloomberg ministr zamiežnych spraŭ Siarhiej Łaŭroŭ, «my nikoli nie admaŭlali, što tam vajujuć rasijskija dobraachvotniki».
10 vieraśnia vajennaja prakuratura Ukrainy abviaściła ab pačatku rasśledavańnia vajennych złačynstvaŭ, u jakich abvinavačvajucca bajcy dobraachvotnickich bataljonaŭ.
Pa słovach hienprakurora Vitala Jaremy, jość dokazy datyčnaści bajcoŭ hetych bataljonaŭ da roznych złačynstvaŭ, uklučajučy razbojnyja napady i rabavańni.
Rasijski bok raniej abviaściŭ u mižnarodny vyšuk kiraŭnika MUS Ukrainy Arsiena Avakava i dnieprapiatroŭskaha hubiernatara Ihara Kałamojskaha ŭ suviazi z kryminalnaj spravaj «ab ŭžyvańni zabaronienych srodkaŭ i mietadaŭ viadzieńnia vajny, zabojstvie pry abciažvajučych abstavinach, pieraškodzie prafiesijnaj dziejnaści žurnalistaŭ i vykradańniu ludziej».
Da tych, chto vajavaŭ na baku danbaskich sieparatystaŭ, u rasijskich pravaachoŭnych orhanaŭ pakul što nijakich pretenzij niama.
