Rasijskaje vydańnie «Dziełavy Pieciarburh» apublikavała rejtynh najbahaciejšych pradprymalnikaŭ horada na Niavie. U śpis uvajšło 158 čałaviek, čyje bahaćci pieravyšajuć 1 młrd rasijskich rubloŭ. Ź ich 8 — uradžency Biełarusi.
Uznačaliŭ rejtynh adzin z najbližejšych siabroŭ Uładzimira Pucina, uładalnik inviestfonda Volga Resources Hienadź Cimčanka. Paśla taho, jak biznesoviec trapiŭ pad sankcyi ES i ZŠA, jon pradaŭ svaje doli ŭ naftatrejdary Gunvor, «Ruskim mory» i kampanii SIBUR. Majomaść Cimčanki aceniena ŭ 604 młrd ras. rubloŭ.
U vierchniaj častcy rejtynhu znachodziacca jašče niekalki siabroŭ prezidenta Rasii, jakija trapili pad sankcyi. Druhoje miesca zajmaje čempijon tendarnych tarhoŭ, hałoŭny padradčyk «Hazproma» Arkadź Ratenbierh (135,5 młrd ras. rubloŭ), šostaje — akcyjanier banka «Rasija» Juryj Kavalčuk (75,25 młrd ras. rubloŭ).
Jość u śpisie paśpiachovych biznesoŭcaŭ i ŭradžency Biełarusi.
Andrej Klamko, Navahrudak
Siomaje miesca ŭ rejtynhu «Dziełavoha Pieciarburha» zaniaŭ uradženiec Navahradka Andrej Klamko. Kapitał biznesoŭca acenieny ŭ 70, 11 młrd ras. rubloŭ. Jon taksama źviazany z Pucinym. Klamko ŭznačalvaje Pieciarburhskuju fiederacyju samba i źjaŭlajecca pieršym vice-prezidentam Mižnarodnaj amatarskaj fiederacyi samba. Hanarovym prezidentam mižnarodnaj arhanizacyi, jak viadoma, źjaŭlajecca kiraŭnik Rasiei.
Cikava, što asnoŭnyja aktyvy Klamko znachodziacca va Ukrainie. Jon — partnior miascovaha biznesmena Vadzima Navinskaha pa «Smart-Chołdynhu». U svaju čarhu, Klamko i Navinski źviazanyja z hałoŭnym ukrainskim aliharcham Rynatam Achmietavym, jany — saŭładalniki mietałurhičnaha chołdynhu «Mietinviest». Były navahrudčanin źjaŭlajecca saŭładalnikam ukrainskaj naftazdabyvajučaj kampanii Regal Petroleum, viadzie sielskahaspadarčy biźnies (Harwest i «Vieras»), maje dolu ŭ porcie ŭ Ačakavie i ŭ niekalkich sudnabudaŭničych zavodach na Čornym mory.
Siarhiej Badrunoŭ, Buda-Kašaloŭski rajon
Na 11-m miescy (kapitał 44, 28 młrd ras. rubloŭ) Siarhiej Badrunoŭ. Biznesmien naradziŭsia ŭ vioscy Brylova ŭ Buda-Kašaloŭskim rajonie i biźnies pačaŭ u Biełarusi: spačatku pradavaŭ pravavuju infarmacyju, potym kampjutary i arhtechniku. Zarabiŭšy na hetym pačatkovy kapitał, jon pierabraŭsia ŭ Sankt-Pieciarburh, dzie inviestavaŭ u pramysłovyja pradpryjemstvy. U pačatku 2000-ch hadoŭ jon kantralavaŭ niekalki dziasiatkaŭ, u asnoŭnym, pryborabudaŭničych zavodaŭ i na ich bazie stvaryŭ pryborabudaŭničy chołdynh — «Karparacyju «Aerakaśmičnaje abstalavańnie». U kancy 2000-ch hadoŭ jon niekatory čas uznačalvaŭ haradski kamitet ekanamičnaha raźvićcia. Z 2012 hoda Badrunoŭ raspradaje mašynabudaŭničyja aktyvy, zaviaršyŭšy hety praces ŭ 2014 hodzie sastupkaj usich aktyvaŭ «Aerakaśmičnych abstalavańniaŭ» dziaržkarparacyi «Rastechnałohii». Uhoda acenienaja ŭ 190 młn dalaraŭ, jakija biznesmien ciapier inviestuje ŭ IT-siektar, vytvorčaść aŭtakampanientaŭ i kamiercyjnuju nieruchomaść.
Viačasłaŭ Zarankoŭ, Orša
Bahaćci adnaho z najbujniejšych budaŭničych biznesmienaŭ paŭnočnaj stalicy składajuć 20,25 młrd ras. rubloŭ, u rejtynhu Zarankoŭ 40-y.
U Sankt-Pieciarburhu jon apynuŭsia ŭ 1973 hodzie, kali pracaŭładkavaŭsia ŭ kiravańnie «Hłavzapstroja» Ministerstva budaŭnictva SSSR. U im jon prajšoŭ šlach ad rabočaha- armaturščyka da kiraŭnika ŭpraŭleńnia. U 1987 Zarankoŭ stvaryŭ i ŭznačaliŭ ZAT «LenŚpiecSMU», jakoje paźniej było pieratvorana ŭ budaŭničuju hrupu «Etałon». Kampanija buduje ŭ Sankt-Pieciarburhu i maskoŭskim rehijonie, u 2011 hodzie jana vyjšła na Łondanskuju fondavuju biržu.
Biźniesmien aktyŭna zajmajecca navukovaj dziejnaściu, vydaje knihi i pradziusiruje filmy.
Alaksandr Jaŭnievič, Šumilina
Majomaść uradženca Šumilina, jaki zaniaŭ u rejtynhu 45-je miesca, składaje 19,5 młrd ras. rubloŭ. Jon vučyŭsia na matematyka-miechaničnym fakultecie ŁDU, pracavaŭ u VNDI hidratechniki im. Viedzianiejeva, a ŭ 1994 hodzie razam z partniorami zasnavaŭ kampaniju «Orymi Trejd». Spačatku jana handlavała mukoj, cukram i tušonkaj, a potym zasiarodziłasia na dystrybucyi čaju. Ciapier «Orymi» vyrablaje i pradaje tracinu čaju i kavy na rasijskim rynku. Druhi bujny biznes Jaŭnieviča — heta sietka pa prodažy tavaraŭ dla ramontu i budaŭnictva «Maksidom». U 2011 hodzie jon staŭ akcyjanieram pieciarburhskaha banka «Abjadnany kapitał».
Ihar Bukata, Niaśvižski rajon
Biznesmien naradziŭsia ŭ znakamitym pasiołku Snoŭ, pierajechaŭ u Leninhrad, dzie ŭ 1989 hodzie razam z rabotnikami Kambinata ablicavalnych i budaŭničych materyjałaŭ utvaryŭ druhi kaapieratyŭ u horadzie. Na jaho bazie i sfarmavałasia hrupa «Adradžeńnie», jakaja vybrukavała bolšaść tratuaraŭ u centry horada. Z-za pamianšeńnia zakazaŭ hrupa asnoŭnuju dziejnaść pieraniesła na Turkmienistan i inšyja krainy Uschodu. Bukata ŭ rejtynhu — na 80-m miescy, jaho bahaćcie — 8, 29 młrd ras. rubloŭ.
Valeryj Sierdziukoŭ, Buda-Kašaloŭski rajon
Eks-hubiernatar Leninhradskaj vobłaści naradziŭsia ŭ vioscy Charošaŭka ŭ Buda-Kašaloŭskim rajonie. Aficyjna jon biznesam nie zajmajecca, na hetaj nivie atrymali pośpiech jaho syny, što dało padstavu składalnikam rejtynhu źmiaścić Sierdziukova na 123-y radok. Majomaść siamji aceniena ŭ 3 młrd ras. rubloŭ. Adzin z synoŭ, Vadzim, źjaŭlajecca arandataram bujnych lasnych i palaŭničych uhodździaŭ u vobłaści i subpadradčykam budaŭnictva hazapravoda Nord Stream. Dzianisu naležać aktyvy ŭ lasnoj i sielskahaspadarčaj halinach.
Siarhiej Snapok, Barysaŭ
Kiraŭnik paliŭnaha chołdynhu «Faeton» zajmaje 145-je miesca, jaho majomaść zaraz składaje 1,5 młrd ras. rubloŭ. U 2008 hodzie były barysaŭčanin mieŭ u horadzie 50 AZS, sielhasuhodździ ŭ 50 tys. hiektaraŭ, tarfiany biznes, a taksama šerah abjektaŭ nieruchomaści. U 2009 hodzie chołdynh paciarpieŭ bankructva, pazyka pierad bankami składała bolš za 4 młrd ras. rubloŭ. Ale mudrahielista vybudavanaja jurydyčnaja abarona dazvalaje Snapkovu zachoŭvać kantrol nad aktyvami i ich finansavymi patokami pa hety dzień.
Jaŭhien Jacyšyk, Viciebsk
Uradženiec Viciebska ŭ rejtynhu zajmaje 153-je miesca z kapitałam 1,28 młrd ras. rubloŭ. Jon byŭ da 2011 hoda adnym z saŭładalnikaŭ stvoranaj adnakurśnikami pa ekanamfaku ŁDU najbujniejšaj picierskaj budaŭničaj kampanii — hrupy ŁSR. U 2011 hodzie Jacyšyn pradaŭ dolu, ale zastajecca kiraŭnikom pa raźvićci kampanii. Niekatory čas jon uznačalvaŭ haradski kamitet pa budaŭnictvie.
