U Biełarusi 1 kastryčnika padaražeje aŭtamabilnaje paliva. Infarmacyju pra heta paćvierdzili na adnoj sa staličnych aŭtazapravak.
Heta budzie čaćviortaje z pačatku hoda pavyšeńnie koštu paliva, papiaredniaje adbyłosia 9 vieraśnia (na 4-4,8%). Na kolki pracentaŭ na hety raz vyraście cana na paliva, dakładna nie viadoma. Pa niekatorych źviestkach, jak i ŭ minuły raz, padaražeńnie składzie nie mienš za 4%.
Nahadajem, 9 vieraśnia kancern «Biełnaftachim» abviaściŭ, što čarhovaje padaražeńnie adbyłosia ŭ ramkach novaj cenavaj palityki i ciapier košt paliva pryviazany da kursu amierykanskaha dołara.
«Pryniata rašeńnie indykatyŭnaj markaj paliva vyznačyć bienzin Ai-92-K5-Jeŭra i apieratyŭna indeksavać jaho košt u zaležnaści ad kursu dołara, — paviedamlaŭ kancern. — Limitavaja maksimalnaja roźničnaja cana na aŭtamabilny bienzin marki Ai-92-K5-Jeŭra pastupalna, u niekalki etapaŭ, budzie ŭstanoŭlena ŭ pamiery, ekvivalentnym 1 dołaru ZŠA za 1 litr. Zatym košt hetaha vidu bienzinu budzie pieryjadyčna indeksavacca ŭ zaležnaści ad źmieny kursu biełaruskaha rubla ŭ adnosinach da dołara ZŠA. Pierahlad koštaŭ na astatnija vidy naftapraduktaŭ budzie rabicca pry zachavańni isnujučych cenavych suadnosin pamiž bienzinam Ai-92-K5-Jeŭra i inšymi markami paliva».
