Siejm Polščy zaćvierdziŭ novy ŭrad na čale z Evaj Kopač.
Jak paviedamlaje Reuters, u padtrymku novaha ŭrada prahałasavała 259 parłamientaryjaŭ, «suprać» — 183, a troje ŭstrymalisia.
Nahadajem, 22 vieraśnia prezident Polščy Branisłaŭ Kamaroŭski zaćvierdziŭ novy skład kabinieta ministraŭ na čale z Evaj Kopač.
Adnak pieršaje ž intervju Evy Kopač vyklikała krytyku jak palitykaŭ, tak i ekśpiertaŭ. U pryvatnaści, adkazvajučy na pytańnie ab padtrymcy Ukrainy zbrojaj, Kopač adznačyła, što padychodzić da jaho pierš za ŭsio jak žančyna. «Ja ŭjaŭlaju, što b ja zrabiła, kali b na vulicy mužčyna razmachvaŭ vostrym instrumientam abo trymaŭ pistalet u ruce… Tamu ja b zajšła ŭ dom, zamknuła jaho i kłapaciłasia ab maich dzieciach», — skazała jana.
Takaja krytyka adkarektavała pazicyju Evy Kopač. Vystupajučy ŭ Siejmie napiaredadni hałasavańnia ab daviery, jana paabiacała praciahvać palityku padtrymki Ukrainy. «My padtrymlivajem prajeŭrapiejski kirunak raźvićcia Ukrainy. Ale adkaznaść za refarmavańnie dziaržavy lažyć na ukraincach», — zajaviła jana.
Pavodle słoŭ premjer-ministra, takaja palityka nie aznačaje zhody ni na zachop terytoryi suvierennaj dziaržavy, ni siłavyja źmieny miežaŭ u Jeŭropie. Eva Kopač dadała, što dla Polščy i jaje hramadzian klučavym źjaŭlajecca spynieńnie ŭzbrojenaj baraćby va Ukrainie i kansalidacyja ŭkrainskaj dziaržavy.
Pasadu ministra zamiežnych spraŭ zaniaŭ Hžehaž Schietyna, jaki, pa prahnozach ekśpiertaŭ, dakładna nie budzie hrać rolu «advakata Ukrainy» na tym uzroŭni, da jakoha Kijeŭ pryvyk pry papiarednim ministry Radasłavie Sikorskim.
Da taho ž, Schietyna nie maje vopytu dypłamatyčnaj pracy i navat nie razmaŭlaje svabodna pa-anhlijsku.
