Hieroj «Bajcoŭskaha hienu» Siarhiej Karniejeŭ zdabyŭ čarhovuju pieramohu
U Biełarusi adznačyli dzień narodzinaŭ nacyjanalnaha boksa. 85 hadoŭ tamu ŭ nas aficyjna pačali pravodzić dvuboi pa hetym mužnym vidzie sportu. U krainie zhadavali dvuchrazovaha čempijona SSSR Anatola Bieraziuka, čempijona śvietu siarod prafiesijanałaŭ Siarhieja Lachoviča, pryziora Alimpijady Viktara Zujeva. A siońnia na avanscenu vychodzić zusim novaja hienieracyja bajcoŭ.
2 kastryčnika na arenie staličnaha cyrka z nahody kruhłaj daty praviali matčavuju sustreču «Biełaruś - Italija». U našaj kamandzie prysutničali ŭsie pieršyja numary. Naturalna, vystupaŭ i Siarhiej Karniejeŭ — zorka zbornaj u vazie 91 kh, jaki byŭ macniejšy za Nikoła Barsoci. Što da ŭsiaho matču, to našy pieramahli ź likam 7:3.
Biełaruskija baksiory ŭsio čaściej stvarajuć infarmacyjnyja nahody. U minułym siezonie toj ža Karniejeŭ pierakanaŭča vystupaŭ u składzie kamandy «Ukrainskija atamany» i byŭ macniejšy za dvuchrazovaha čempijona śvietu i dvuchrazovaha pryziora Alimpijady Klemiente Rusa.
Hetym letam hieroi prajektu «Bajcoŭski hien» Siarhiej Chamicki i Alaksandr Uścinaŭ trapili ŭ epicentr suśvietnych skandałaŭ. Adnaho źniali z boju praz admatany płastyr, a ad druhoha sapiernik prosta ŭciok u dzień vystupleńnia. Spravicca ź biełarusami pry dapamozie sumlennych spartovych mietadaŭ zornyja apanienty nie zmahli.
«Paśla Alimpijady ŭ Afinach 2004 hoda boks u krainie vyjšaŭ na tak zvanaje płato — usio išło roŭna, prosta, ale, na žal, nie było rostu, — apisvaje situacyju Dzianis Sabaleŭski, vykanaŭčy dyrektar Biełaruskaj fiederacyi boksa. — Ale mienavita ciapier, u apošnija dva hady, zdaryŭsia padjom. U nastupnym hodzie budzie prachodzić alimpijskaja kvalifikacyja, i my płanujem atrymać jak minimum čatyry alimpijskija licenzii».
U pryvatnaści, staŭki robiacca na Michaiła Daŭhalaŭca (75 kh), Vazhiena Safarjanca (60 kh) i, zrazumieła, Siarhieja Karniejeva, jaki stanie hierojem nastupnaha vypusku «Bajcoŭskaha hienu».
«Bajcoŭski hien« — prajekt kampanii «Budźma biełarusami!», meta jakoha — paznajomić hramadstva z našymi vybitnymi spartoŭcami! Časta ich lepš viedajuć za miažoj, čym doma. A našy hieroi zazvyčaj majuć unikalnyja losy, vartyja ŭvasableńnia ŭ filmach, knihach, pieśniach dy prymaŭkach. Jany — nośbity biełaruskaha bajcoŭskaha hienu — hatovyja zaciata bicca za honar krainy i kožnaha biełarusa. Znajomciesia bližej, hanaryciesia imi, zaŭziejcie za našych!
