Jak paviedamlaje HUUS Minharvykankama, supracoŭniki apieratyŭna-pošukavaha adździeła źviarnuli ŭvahu na aŭtamašynu «Deu-Nieksija» z rasijskimi numarami. Dva mužčyny i dźvie žančyny (troje ź ich niesłavianskich źniešnaści), jakija znachodzilisia ŭ sałonie, pavodzili siabie niezvyčajna. Inšamarka, pieramiaščałasia pa vulicach Frunzienskaha, Zavodskaha i Partyzanskaha rajonaŭ, spyniałasia ŭ ludnych miescach — kala kramaŭ abo paštovych adździaleńniaŭ. Z mašyny vychodzili žančyny i imknulisia zaviazać hutarku ź piensijanierami.
Tema dla razmovy vybirałasia pa situacyi, čaściej za ŭsio prapanoŭvałasia abmierkavać pytańnie zamieny papiarovych piensijnych paśviedčańniaŭ na płastykavyja. Žančyny nazyvali siabie rabotnikami sacyjalnaj słužby, pry hetym šukali padstavy dla taho, kab trapić dadomu da stałaha čałavieka. Za try hadziny «Deu» ździejśniła vosiem padobnych prypynkaŭ, adnak nivodnaja sproba zbližeńnia ź minčanami nie skončyłasia pośpiecham.
Kali mašyna pa Partyzanskim praśpiekcie nakiravałasia da vyjezdu z horada, apieratyŭnyja supracoŭniki vyrašyli zatrymać aŭtamabil i pravieryć asobu kiroŭcy i pasažyraŭ. A litaralna praź niekalki chvilin z Savieckaha RUUS pastupiła infarmacyja pra kvaterny kradziež, ździejśnieny žančynaj, jakaja pradstaviłasia rabotnikam sacyjalnaj słužby.
Vaśmidziesiacihadovaja žančyna, jakaja žyvie ŭ kvatery doma pa vulicy Kujbyšava, źviarnułasia ŭ milicyju i raspaviała ab kradziažy bujnoj sumy hrošaj. Akazałasia, što napiaredadni da jaje prychodziła nieviadomaja, jakaja nazvałasia sacyjalnym rabotnikam i prapanoŭvała zamianić piensijnaje paśviedčańnie. Paśla jaje sychodu vyjaviłasia prapaža tysiačy dalaraŭ, tysiačy jeŭra i dzieviaci miljonaŭ rubloŭ. Prykmiety hości byli padobnyja da prykmietaŭ adnoj z zatrymanych. Užo pa darozie ŭ Savieckaje RUUS jana pryznałasia ŭ ździajśnieńni kradziažu na vulicy Kujbyšava. Nieŭzabavie «sacrabotnicu» apaznała i paciarpiełaja piensijanierka.
Asoby zatrymanych vyśvietlenyja. Žančynie słavianskaj źniešnaści 31 hod, jaje smuhlavaj naparnicy 50 hadoŭ. Starejšamu mužčynu 51 hod, małodšamu - 27 hadoŭ. Jany pryjechali z Maskoŭskaj vobłaści. U ciapierašni čas padazravanaja ŭ kradziažy źmieščana ŭ izalatar časovaha ŭtrymańnia, jaje spadarožniki — u centr izalacyi pravaparušalnikaŭ.
Va ŭpraŭleńni kryminalnaha vyšuku HUUS ličać, što zatrymanyja mahli ździejśnić i inšyja złačynstvy, mahčyma, u inšych haradach krainy. Ich fota źmieščanyja na sajcie HUUS.
