Skančvajecca trochhadovy termin adbyćcia pakarańnia ŭ turmie strohaha režymu palitviaźnia Jaŭhiena Vaśkoviča. Na praciahu niekalkich dzion Jaŭhien budzie pieraviedzieny z turmy №4 ŭ kałoniju №15. Abiedźvie ŭstanovy znachodziacca ŭ Mahilovie.
12 kastryčnika 2011 hoda u vyniku rašeńnia atestacyjnaj kamisii Jaŭhien Vaśkovič byŭ abvieščany złosnym parušalnikam i byŭ pieraviedzieny ŭ mahiloŭskuju turmu strohaha režymu. U turmie Jaŭhien prajšoŭ praź cisk, abmiežavańni, šmatlikija źmiaščeńni ŭ ŠYZA…
247 —dakładnaja kolkaść sutak, jakija Jaŭhien pravieŭ u štrafnym izalatary mahiloŭskaj «krytki». Jon vytrymaŭ. Padpisvać prašeńnie ab pamiłavańni palitviazień nieadnarazova kateharyčna admaŭlaŭsia.
Arhkamitet pa stvareńni partyi «Biełaruskaja Chryścijanskaja Demakratyja» zaklikaje dasyłać listy padtrymki palitźniavolenamu siabru BCHD Jaŭhienu Vaśkoviču. Listy padtrymki nieabchodna pisać na novy adras:
Papraŭčaja kałonija № 15, 213105, h.Mahiloŭ, Słaŭharadskaja šaša, p/a Viejna.
Mama Jaŭhiena Rušanija Ivanaŭna skazała «Našaj Nivie»:
«Ja spadziajusia, što Ženia troški zrazumieŭ, što heta ŭsio ž turma, i što nie treba iści na parušeńni režymu. Tady my i bačycca ź im zmožam čaściej. Bo što ž heta – adna sustreča na hod. Tut z rodnymi nie bačyšsia, i to sumuješ, a kali sustrakaješsia z synam raz na hod, dy jašče cieraz hetyja kraty…».
Ale ž, padkreślivaje Rušanija Vaśkovič, naŭrad ci pavodziny jaje syna źmieniacca.
«Ženia vielmi pryncypovy chłopiec. Jaho nie pierarabić. Kali jon štości ŭziaŭsia rabić – to zrobić abaviazkova. I kali zadumaŭ štości – adhavaryć jaho ŭžo niemahčyma», — kaža jana.
