Ihar Alinievič praviadzie ŭ štrafnym izalatary 10 dzion.
Pra heta sajtu charter97.org paviedamiła maci palitviaźnia Valancina Alinievič.
«Na minułym tydni źbiralisia da Ihara na karotkaterminovaje spatkańnie, i tut nam paviedamlajuć, što jon u štrafnym izalatary, — paviedamiła jana. — Jak hrom ź jasnaha nieba. Reč u tym, što dasłoŭna ŭ kancy červienia jaho pieraviali ŭ novuju kałoniju, jakaja adroźnivałasia ad raniejšaj, navapołackaj, svajoj ekałohijaj, bačnaściu zachavańnia zakonnaści, bytavymi ŭmovami i h.d. Uvieś hety čas Ihar pazityŭna adzyvaŭsia pra bolš-mienš čałaviečyja ŭmovy ŭ hetaj kałonii i, o cud, jamu navat dazvolili nabyć telefonnuju kartku i patelefanavać pieršy raz za paŭhoda ŭ pieršaj dekadzie vieraśnia. Napeŭna, prosta pryhladalisia.
Zahad jość zahad i jaho treba vykonvać. Spačatku kanfiskavali moj list, matyvujučy tym, što tam zabaronienyja źviestki. Potym pasadzili na 10 dzion u štrafny izalatar.
Nie viedaju, što za nieludzi i damarosłyja psichołahi pracujuć u našych śpiecsłužbach, ale heta ŭžo stała tradycyjaj sadžać našych palityčnych mienavita na ich dni narodzinaŭ. Tak było i z Kolem Dziadkom na jahony dzień narodzinaŭ ŭ žniŭni (20 dzion štrafnoha izalatara), tak i z astatnimi palityčnymi viaźniami. Łaŭry Vaśkoviča, jaki prasiadzieŭ za hod u štrafnym izalatary 240 dzion, vidać, nie dajuć spakoju».
Maci palitviaźnia paviedamiła, što na minułym tydni pryjšła paštoŭka ad Ihara Alinieviča, datavanaja 30 vieraśnia.
«Dobry dzień, mama i tata! — cytuje jana. — Paśla taho kanfiskavanaha lista atrymaŭ vašaje vinšavańnie z dniom narodzinaŭ. Dziakuj! Vielmi dušeŭnaje! Akramia vašaha, pakul što nie atrymlivaŭ nivodnaha vinšavańnia. Na žal, ale chmary nad mnoj zhuścilisia. Užo adsiedzieŭ 10 dzion u štrafnym izalatary i, chutčej za ŭsio, hetym sprava nie skončycca. Uvohule, usio nanova, viartajemsia na ŭzrovień 2012 hoda. Pry takim raskładzie ja źjaŭlusia ŭ atradzie 11 kastryčnika, kali nie daduć dadatkovych dzion aryštu. Ale abaviazkova patelefanujcie ŭ kałoniju ŭ hety dzień dla ŭpeŭnienaści, što ja ŭ atradzie, a nie ŭ štrafnym izalatary. Na hetym ja skančaju. Całuju! Ja źbirajusia abskardzić usio».
Palitviazień prabudzie ŭ štrafnym izalatary da 20 kastryčnika.
Aktyvist anarchisckaha ruchu Ihar Alinievič byŭ asudžany na 8 hadoŭ pazbaŭleńnia voli pavodle abvinavačvańnia ŭ chulihanskich dziejańniach što da aficyjnych budynkaŭ. Svajoj viny jon nie pryznaŭ i admoviŭsia pisać prašeńnie ab pamiłavańni.
