Dvaich dziaciej, pakinutych biez nahladu, udałosia vyratavać na pažary ŭ adnym z šmatkvaternych damoŭ Babrujska, paviedamili ŭ Ministerstvie pa nadzvyčajnych situacyjach Biełarusi.
U centr apieratyŭnaha ŭpraŭleńnia Babrujskaha padraździaleńnia MNS 18 kastryčnika ŭ 23.32 pastupiła paviedamleńnie, što z kvatery na druhim paviersie piacipaviarchovaha žyłoha doma na vulicy Puškina išoŭ dym. Ratavalniki, jakija prybyli na miesca nadzvyčajnaha zdareńnia, vyjavili ŭ joj dvaich dziaciej (chłopčyki 2007 i 2009 hadoŭ naradžeńnia), pakinutych adnych. Z pałajučaha pamiaškańnia dziaciej vynieśli i pieradali bryhadzie chutkaj miedycynskaj dapamohi. «Z atručvańniem praduktami hareńnia siaredniaj ciažkaści dzieci špitalizavanyja ŭ balnicu, - havorycca ŭ paviedamleńni MNS. - Ź vierchnich pavierchaŭ šmatpaviarchovaha doma evakuiravanyja 11 čałaviek».
Kvatera paharelcaŭ naležyć 29-hadovaj maci dziaciej. Ŭstanoŭlena, što adny chłopčyki byli prykładna z 23.00, a ŭ momant ŭźniknieńnia pažaru haspadynia doma znachodziłasia ŭ pasiołku Hłuša Babrujskaha rajona na źlocie bajkieraŭ. Papiaredniaja pryčyna pažaru — dziciačaje svavolstva z ahniom.
MNS u čarhovy raz zaklikaje baćkoŭ ni ŭ jakim razie nie pakidać maleńkich dziaciej biez nahladu, a taksama rekamienduje pahavaryć ź dziećmi ab niebiaśpiecy ahniu.
Z pačatku hoda na pažarach zahinuli 12 dziaciej. Niekalki dzion tamu achviaraj biesturbotnaści darosłych stała dvuchhadovaja dziaŭčynka z Rečycy.
