22-hadovy minčuk pryznany vinavatym u kradziažy pa č. 3 art. 205 KK i pryhavorany da dvuch hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach uzmocnienaha režymu.
Jak paviedamiŭ staršy pamočnik prakurora Minska Siarhiej Bałašaŭ, złačynstva było ŭčyniena 16 lutaha hetaha hoda. Mužčyna dapamahaŭ svajoj žoncy, indyvidualnamu pradprymalniku, afarmlać viasielle. Paśla ŭračystaści, a pieršaj hadzinie nočy, jon viarnuŭsia ŭ zabaŭlalnuju ŭstanovu za ŭpryhažeńniami. Vychodziačy z budynka, jon ubačyŭ na hanku pryhožy pakiet, u jakim akazalisia hrošy i inšyja padarunki dla maładych.
Pakinuty biez dohladu pakiet mužčyna zabraŭ z saboj, ab hetym nikomu ničoha nie skazaŭ, navat žoncy.
Jak vynikaje z materyjałaŭ śledstva, u pakiecie znachodziłasia 400 jeŭra, 10.000 rubloŭ RF, 5.500 dołaraŭ, amal 8.000.000 biełaruskich rubloŭ, imianny siertyfikat, fotaaparat i inšyja padarunki — usiaho na sumu bolš za 73,4 młn rubloŭ. Złodzieja pravaachoŭnyja orhany zatrymali praź niekalki dzion.
Maładyja zaŭvažyli prapažu tolki ranicaj nastupnaha paśla viasiella dnia. Małady muž raskazaŭ, što pakinuŭ pakiet na vulicy, a sam pajšoŭ pravodzić haściej, a viarnuŭšysia, nie źviarnuŭ uvahu na toje, što pakiet adsutničaje, zabraŭ žonku i pajechaŭ. Chto ŭčyniŭ kradziež, paciarpiełyja daviedalisia, prahledzieŭšy zapisy kamier videanazirańnia.
30 červienia pryhavoram suda Leninskaha rajona stalicy abvinavačvany byŭ asudžany na čatyry hady pazbaŭleńnia voli z adbyvańniem pakarańnia ŭ kałonii va ŭmovach uzmocnienaha režymu z kanfiskacyjaj majomaści. Pryhavor byŭ abskardžany. U vyniku sudovaja kalehija Minskaha harsuda skaraciła termin pakarańnia na dva hady i vyklučyła dadatkovaje pakarańnie ŭ vyhladzie kanfiskacyi majomaści. Pryhavor nabyŭ moc.
