Z prośbaj padtrymać adnaho ź lideraŭ niezarehistravanaj arhanizacyi «Małady front» Artura Fińkieviča źviarnuŭsia 17 śniežnia da pasłoŭ zamiežnych krainaŭ Alaksandar Milinkievič.
7 červienia Arturu Fińkieviču, jaki siadzić za naniasieńnie palityčnych hrafici, było admoŭlena va ŭmoŭna-daterminovym vyzvaleńni, a 20 śniežnia ŭ Mahiloŭskim haradskim sudzie raspačniecca novy praces. A. Fińkieviču pradjaŭlena abvinavačańnie pavodle art. 415 KK (uchileńnie ad adbyćcia pakarańnia ŭ vyhladzie abmiežavania voli). Jamu pahražaje da troch hadoŭ pazbaŭleńnia voli.
«Artur Fińkievič — heta vysokamaralny małady čałaviek, jaki prykładaje vialikija namahańni dla vychoŭvańnia moładzi ŭ duchu patryjatyzmu, pavahi da nacyjanalnych tradycyj, rodnaj movy, kultury i historyi, — piša ŭ svaim zvarocie A.Milinkievič. — Jon apynuŭsia za kratami tolki za toje, što skarystaŭsia svaim nieadjemnym pravam na svabodu vykazvańnia svaich mierkavańniaŭ».
A. Milinkievič prosić urady krain, jakija pradstaŭlajuć dypłamaty, «prajavić salidarnaść z Arturam Fińkievičam i z usimi inšymi biełaruskimi palityčnymi źniavolenymi», «pryniać adpaviednyja zachady dziela ŭździejańnia na ŭłady Biełarusi z metaj poŭnaha i biezahavorkavaha vyzvaleńnia palityčnych viaźniaŭ i spynieńnia palityčnych represij u Biełarusi».
Palityk źjaŭlajecca staršynioj hramadskaha kamiteta pa vyzvaleńni A.Fińkieviča.
Jak paviedamiŭ BiełaPAN A. Milinkievič, 20 śniežnia jon płanuje pryjechać u Mahiloŭski abłasny sud dla nazirańnia za pracesam.
