Pravodzicca pravierka pa fakcie DTZ u Kobrynskim rajonie, u vyniku jakoha kiroŭca źbiŭ piešachoda i ŭciok ź miesca zdareńnia.
Jak paviedamiŭ načalnik adździaleńnia pa ahitacyi i prapahandzie DAI UUS Bresckaha abłvykankama Natalla Sacharčuk, 2 listapada mužčynu ŭ kiuviecie z traŭmami, charakternymi dla darožna-transpartnaha zdareńnia, na 15-m km aŭtadarohi Hrušava — Dziamidaŭščyna — Šemietaŭka znajšoŭ miascovy žychar i vyklikaŭ chutkuju dapamohu. Paciarpiełaha, 39-hadovaha žychara vioski Padziamieńnie, z adkrytaj čerapna-mazhavoj traŭmaj, pierałomam kaściej nosa, vialikaj ranaj levaha ściahna, pieraachaładžeńniem dastavili ŭ Kobrynskuju centralnuju rajonnuju balnicu.
Padčas apieratyŭna-vyšukovych mierapryjemstvaŭ było ŭstanoŭlena, što mužčyna atrymaŭ traŭmy 1 listapada kala 21.00 u vyniku najezdu aŭtamabilem «Falksvahien-Pasat», za rulom jakoha znachodziŭsia 47-hadovy žychar Drahičynskaha rajona.
Supracoŭniki DAI znajšli kiroŭcu i aŭtamabil 3 listapada ŭ 12.05 u vioscy Hrušava Kobrynskaha rajona. «Falksvahien» kanfiskavany i źmieščany na štrafstajanku.
Pavodle papiarednich źviestak, na zakruhleńni darohi ŭleva kiroŭca nie spraviŭsia z kiravańniem, vyjechaŭ na pravuju pa chodzie ruchu abočynu i ŭčyniŭ najezd na piešachoda. Pavodle słoŭ aŭtamabilista, paśla najezdu jon spyniŭsia, nie ŭbačyŭšy paciarpiełaha, pakinuŭ miesca DTZ.