 |
Z 1 studzienia spraščajecca paradak rehistracyi i likvidacyi subjektaŭ haspadarańnia. Dziejučaja dazvolnaja pracedura rehistracyi zamianiajecca zajaŭnaj.
U Biełarusi z 1 studzienia 2008 hoda spraščajecca paradak dziaržaŭnaj rehistracyi i likvidacyi subjektaŭ haspadarańnia. Adpaviedny dekret numar 8 prezident Biełarusi padpisaŭ 17 śniežnia, paviedamili BIEŁTA u pres‑słužbie kiraŭnika dziaržavy.
U pryvatnaści, dziejučaja dazvolnaja pracedura rehistracyi zamianiajecca zajaŭnaj. Vyklučajecca abaviazak rehistrujučych orhanaŭ pravodzić pravierku dakumientaŭ, što pradstaŭlajucca dla dziaržaŭnaj rehistracyi, ale adnačasova ŭskładajecca na zajaŭnika adkaznaść jak za adpaviednaść zakanadaŭstvu hetych dakumientaŭ, tak i za dakładnaść źviestak, paviedamlenych u ich. U vypadku naŭmysnaha pradstaŭleńnia zajaŭnikam niedakładnych źviestak (utojvańnie faktyčnych abstavin), takija asoby majuć prava paŭtorna źviarnucca za dziaržaŭnaj rehistracyjaj tolki paśla zaviaršeńnia adnaho hoda z dnia vyniasieńnia rehistrujučym orhanam rašeńnia ab admovie ŭ dziaržaŭnaj rehistracyi.
Akramia taho, admianiajecca nieabchodnaść nazyvańnia va ŭstanoŭčych dakumientach vidaŭ dziejnaści, płanujemych da ažyćciaŭleńnia, za vyklučeńniem licenzavanych. U astatnich vypadkach nieabchodna budzie tolki nazvać płanujemyja da ažyćciaŭleńnia vidy dziejnaści ŭ zajavie ab dziaržaŭnaj rehistracyi abo paviedamić rehistrujučamu i padatkovamu orhanam ab takich vidach da pačatku ich ažyćciaŭleńnia.
Dekretam taksama źmianšajucca ŭ dva razy minimalnyja pamiery statutnych fondaŭ jurydyčnych asob i subsidyjarnaj adkaznaści ŭdzielnikaŭ tavarystvaŭ z dadatkovaj adkaznaściu.
Skaračajecca taksama pieralik dakumientaŭ, što padajucca dla dziaržaŭnaj rehistracyi. Vyklučajecca nieabchodnaść pradstaŭleńnia harantyjnaha piśma ab pradastaŭleńni pamiaškańnia ŭ jakaści miesca znachodžańnia (źviestki ab kankretnym adrasie, pa jakim budzie raźmiaščacca arhanizacyja, pavinny paviedamlacca tolki ŭ zajavie na dziaržaŭnuju rehistracyju). Nie treba pradstaŭlać i dakumienty, jakija źmiaščajuć źviestki ab ułaśnikach majomaści (zasnavalnikach, udzielnikach) kamiercyjnaj arhanizacyi — fizičnych asobach, a taksama rašeńnia ab stvareńni jurydyčnaj asoby, ankiety zasnavalnika (udzielnika) jurydyčnaj asoby.
Uparadkoŭvajecca miechanizm pryniaćcia rašeńniaŭ ab dziaržaŭnaj rehistracyi i ŭniasieńnia zapisu ŭ Adziny dziaržaŭny rehistr jurydyčnych asob i indyvidualnych pradprymalnikaŭ, što skarocić praciahłaść i sprościć ahulnuju praceduru rehistracyi.
Termin dziaržaŭnaj rehistracyi skaračajecca z 20 da piaci rabočych dzion.
Pry likvidacyi jurydyčnych asob i spynieńni dziejnaści indyvidualnych pradprymalnikaŭ zamacoŭvajecca pryncyp «adnaho akna» va ŭzajemaadnosinach rehistrujučaha orhana ź inšymi dziaržaŭnymi orhanami. Tak, rehistrujučy orhan pavinien paviedamić ab pačatku pracedury likvidacyi (spynieńnia dziejnaści) usie ŭpaŭnavažanyja orhany, u jakich likvidujemy subjekt haspadarańnia byŭ pastaŭleny na ŭlik, a taksama mytnyja orhany. Na praciahu 30 rabočych dzion z dnia atrymańnia paviedamleńnia hetyja arhanizacyi, a nie subjekt haspadarańnia, nakiroŭvajuć rehistrujučamu orhanu nieabchodnyja dla zaviaršeńnia pracedury likvidacyi źviestki. Za subjektam haspadarańnia zachoŭvajecca abaviazak pradstaŭleńnia ŭ rehistrujučy orhan tolki dakumientaŭ, što znachodziacca ŭ jaho: aryhinała paśviedčańnia ab dziaržaŭnaj rehistracyi, piačaci, štampaŭ, likvidacyjnaha bałansu i da t.p. Na padstavie pradstaŭlenych dakumientaŭ rehistrujučy orhan vyklučaje subjekt haspadarańnia z Adzinaha dziaržaŭnaha rehistra jurydyčnych asob i indyvidualnych pradprymalnikaŭ.
Pryniaćcie dekreta treba razhladać jak čarhovy krok va ŭdaskanaleńni i spraščeńni pracedury dziaržaŭnaj rehistracyi i likvidacyi subjektaŭ haspadarańnia, što daje mahčymaść zrabić uzajemaadnosiny pamiž rehistrujučym orhanam i hetymi subjektami bolš prazrystymi i adkrytymi, adznačyli ŭ pres‑słužbie.
