«Pryčynaj stała pravakacyja, jakuju suprać jaho zładzili. Pra jaho raspaŭsiudzili źviestki, što raniej, jašče ŭ pieršuju adsiedku, jon nibyta siadzieŭ u kamiery z čałaviekam, u jakoha byŭ nizki status. I z hetaj pryčyny taki status pavinien raspaŭsiudžvacca i na jaho. Maŭlaŭ, nie moža ŭ tym liku siadzieć u stałoŭcy za ahulnym stałom. Tamu jon uvohule admoviŭsia prymać ježu.
Prychodzić u stałoŭku i kaža, što admaŭlajecca jeści. Pakul jaho ŭ karcar za heta nie sadziać, ale situacyja nijak nie mianiajecca da lepšaha, da taho ž administracyja zabaraniła ŭsim viaźniam pad pahrozaj pakarańnia kantaktavać z Andrejem. Viedaju, što syn bačyŭsia ŭ kałonii z načalnikam, ale vynik hetaj razmovy mnie nieviadomy. Ja taksama sprabuju prabicca na pryjom da kiraŭnictva kałonii, ale pakul heta nie ŭdajecca», — paviedamiŭ 10 listapada baćka byłoha palitviaźnia Valer Bandarenka.
U žniŭni Andrej Bandarenka byŭ asudžany na 3 hady źniavoleńnia pavodle abvinavačańnia ŭ złosnym chulihanstvie. U sudzie jon hetaha nie pryznaŭ, adnak vybačyŭsia pierad paciarpiełymi žančynami za chulihanskija dziejańni. U kastryčniku minski haradski sud adchiliŭ skarhu Andreja Bandarenki.
Valer Bandarenka paviedamiŭ, što pisaŭ u Departament vykanańnia pakarańniaŭ MUS chadajnictva, kab syna nakiravali dla adbyćcia pakarańnia ŭ mahiloŭskuju kałoniju. Toje, što Andreja Bandarenku nakiravali ŭ babrujskuju kałoniju, dzie jon adbyvaŭ niezakonnaje asudžeńnie ŭ 2009–2010 hadach i dzie, pavodle jahonych słovaŭ, jaho katavali, Valer Bandarenka ličyć pomstaj.
