Ministerstva adukacyi Biełarusi nakiravała zajaŭku ŭ Bałonski sakrataryjat ab uvachodžańni ŭ Bałonski praces i dałučeńni da Jeŭrapiejskaj prastory vyšejšaj adukacyi (JEPVA), paviedamiŭ pieršy namieśnik ministra adukacyi Vadzim Bohuš.
Pavodle jaho słoŭ, kanfierencyja ministraŭ adukacyi krain, jakija padpisali Bałonskuju dekłaracyju, adbudziecca ŭ mai 2015 hoda i na joj moža być razhledžana biełaruskaje pytańnie.
Nahadajem, heta ŭžo druhaja sproba Biełarusi ŭstupić u Bałonski praces. Pieršuju zajaŭku płanavałasia razhledzieć u krasaviku 2012 hoda na samicie ministraŭ adukacyi Jeŭrapiejskaj prastory vyšejšaj adukacyi. Adnak na pasiadžeńni Bałonskaj rabočaj hrupy, na jakim abmiarkoŭvalisia pytańni padrychtoŭki samita, było pryniata rašeńnie źniać zajaŭku Biełarusi z paradku dnia. Pryčyna ŭ tym, što Biełaruś nie vykonvaje pryncypy Bałonskaha pracesu, takija jak akademičnaja vola, instytucyjnaja aŭtanomija i studencki ŭdzieł u kiravańni vyšejšaj adukacyjaj.
Adkazvajučy na pytańnie BiełaPAN, što źmianiłasia ŭ sistemie vyšejšaj adukacyi z 2012 hoda, Bohuš skazaŭ, što praces, źviazany z madernizacyjaj adukacyi, pieraŭtvareńniami, idzie daŭno. Adbyvajucca instytucyjnyja, strukturnyja i źmiastoŭnyja źmieny. Tak,
uviedziena dyfierencyjacyja terminaŭ padrychtoŭki na pieršaj stupieńcy adukacyi ad čatyroch da piaci hadoŭ. Mahistratura vydzielena ŭ asobnuju stupieńku padrychtoŭki, jość intehravanyja prahramy pa asabliva składanych śpiecyjalnaściach, navučańnie pa jakich na vychadzie daje kvalifikacyju na ŭzroŭni mahistra.
Kažučy pra akademičnyja svabody, aŭtanomii i studencki udzieł u kiravańni vyšejšaj adukacyjaj, Bohuš zaznačyŭ, što «studenckaje samakiravańnie va ŭniviersitetach Biełarusi pramoje, heta zakładziena ŭ mieniedžmiencie VNU». «U kožnym saviecie ŭniviersiteta studenty prysutničajuć z pravam hołasu — vyrašalnaha, nie daradčaha, — skazaŭ Bohuš. — Usie studenckija inicyjatyvy ŭličvajucca pry pryniaćci rašeńniaŭ. Akramia taho novyja padychody dazvalajuć studentu bolš hnutka vybudoŭvać praces navučańnia, vybirajučy tyja ci inšyja kursy. Heta datyčycca i sacyjalna-humanitarnaha błoka, i śpiecyjalnych dyscyplin». Takim čynam navučalny praces stanovicca indyvidualizavanym, a vypusknik moža maksimalna realizavać svoj patencyjał u nacyjanalnaj ekanomicy.
Razam z tym manitorynh parušeńniaŭ akademičnych svabod, jaki pravodzić Hramadski Bałonski kamitet i maładziožnaja prafsajuznaja hrupa «Studenckaja rada», kanstatuje nievykanańnie prapisanaj na zakanadaŭčym uzroŭni kvoty — 25% studentaŭ u składzie rady VNU. Pavodle danych manitorynhu, u BDU, naprykład, siarod 90 členaŭ savieta tolki 10 studentaŭ, a ŭ Mižnarodnym dziaržaŭnym ekałahičnym univiersitecie imia Sacharava — adzin student z 37 členaŭ savieta.
Na hety kont Bohuš skazaŭ, što «studenty majuć mahčymaść praz svajho paŭnamocnaha pradstaŭnika vyłučać lubyja inicyjatyvy». «Ja nie sutykaŭsia ź situacyjami, — adznačyŭ namieśnik ministra, — kali aficyjna vyłučanyja studenckija inicyjatyvy nie razhladalisia b adpaviednym čynam».
