Karystalniki sacyjalnych sietak paviedamlali, što biełaruski bok uzmacniŭ pravierki i heta stała pryčynaj vializnych čerhaŭ.
Dziaržaŭny mytny kamitet Biełarusi abvierh paviedamleńni pra šmatkiłamietrovyja čerhi z hruzavych aŭtamabilaŭ na biełaruska-rasijskaj miažy. «Prypynak transpartnaha srodku doŭžycca nie bolš za 5-10 chvilin. Stolki času sychodzić na adzin transpartny srodak dla vyvučeńnia dakumientaŭ i ŭdakładnieńnia źviestak ŭ ich», — cytuje paviedamleńnie pradstaŭnika pres-słužby mytnaha kamiteta RIA «Novosti».
Jon taksama nie paćvierdziŭ infarmacyju pra ŭviadzieńnie Biełaruśsiu bolš žorstkaha mytnaha kantrola, jaki, nibyta, i spravakavaŭ čerhi na miažy. Razam z tym, na biełaruska-rasijskaj miažy pravodzicca śpiecyjalnaje kantrolnaje mierapryjemstva.
Nahadajem, 6 śniežnia na sajcie Dziaržaŭnaha mytnaha kamiteta Biełarusi była źmieščana infarmacyja pra vyniki manitorynhu na biełaruska-rasijskaj miažy, jaki pravodziŭsia sumiesna mytnikami, pravaachoŭnikami, słužbami fitasanitarnaha i vieterynarnaha kantrola. Za piać dzion było spyniena siem sprobaŭ uvozu na terytoryju Rasii tavaraŭ, jakija traplajuć pad sankcyi. Za toj ža čas było prypyniena 86 hruzavych transpartnych srodkaŭ, jakija ruchalisia z hruzami z Rasii. Pa 15 faktach uvozu ŭ Biełaruś tavaraŭ biez adpaviednych dakumientaŭ pačaty administracyjny praces.
U kancy listapada Raśsielhasnahlad zabaraniŭ tranzit praz terytoryju Rasii charčavańnia, jakoje znachodzicca pad embarha, u trecija krainy praz punkty propusku Biełarusi z-za vyjaŭlenaj kantrabandy. Mnohija partyi da zajaŭlenych krain nie dajazdžali, a nasamreč vyhružalisia ŭ Rasii. Ciapier uvoz takich tavaraŭ dla tranzitu dapuskajecca tolki praz punkty propusku, raźmieščanyja na rasijskim učastku źniešniaj miažy Mytnaha sajuza. Minsk zajaviŭ, što dadzienaja miera parušaje mižnarodnyja damovy.
