Rak u hłybini hałavy albo šyi časta pryznajecca nieapierabielnym – zanadta ciažka dasiahnuć puchliny, abminuŭšy žyćciova važnyja orhany, sasudy, niervy, zanadta ciesna pieraplecienyja roznyja funkcyjanalnyja sistemy, hranicy anatamičnych vobłaściaŭ umoŭnyja. Tamu lubaja, navat dobra vykananaja apieracyja ŭ hłybiniach hałavy ci šyi niepaźbiežna niasie kalectva i istotna paharšaje jakaść žyćcia čałavieka. Ale źjaviłasia nadzieja pieraadoleć hetuju prablemu.
Revalucyjny mietad transaralnaj robatachirurhii abiacaje minimalnaje ŭmiašańnie: navučany chirurh apieryruje dystancyjna, manipulatarami robata pad kantrolem 3D-kamiery. Kiravańnie adbyvajecca pry dapamozie elektronnaj prystaŭki, funkcyja retrakcyi tkanak dazvalaje palepšyć ahlad apieracyjnaha pola.
Robat raspracavany ŭ Łos-Andžałasie doktaram Ebi Miendelsan, kiraŭnikom adździeła čerapna-tvaravaj robatachirurhii. Pa śćviardžeńni aŭtara, dla pacyjenta apieracyja pa vydaleńni puchliny budzie nahadvać vizit da stamatołaha, i ŭžo praz kolki dzion budzie nastupać poŭnaje adnaŭleńnie biez budź-jakich ciažkich nastupstvaŭ.
Dobry šaniec u suviazi z novaj technałohijaj atrymajuć najpierš pacyjenty z puchlinami zahłotkavaj prastory, prablema jakich prylahaje da asnavańnia čerapa – vobłaści bujnych sasudaŭ i nervaŭ. Nieparaŭnalnuju palohku novy mietad pryniasie i tym, kamu tradycyjnaja ankachirurhija prapanuje paprostu vyrazać tracinu ci pałovu tvaru plus čverć šyi – dziela papiaredžańnia recydyvu i mietastazaŭ.
Značna źmienšacca pakazańni da chimija- i promnievaj terapii praapieravanych chvorych, a kali dadatkovaje lačeńnie im usio ž taki spatrebicca – z-za minimalnaj raniavoj pavierchni nie ŭźniknuć prablemy z zažyŭleńniem. Pakolki šlach da puchliny idzie praz rot, na skury nie zastajecca rubcoŭ i ŭ dalejšym nie patrabujucca rekanstruktyŭnyja apieracyi.
Užo bolš za 100 pacyjentaŭ praapieravanyja pry dapamozie hetaha robata. Jany spadziajucca, što pieramahli svaju chvarobu. Ale kali navat i sutyknucca ź joju iznoŭ, ich nie skalečanaje lačeńniem cieła i nie zdratavany pakutami duch daduć im dobry šaniec u baraćbie.
