Biełaruś viartajecca ŭ 2011 hod — čas čerhaŭ kala abmieńnikaŭ i deficyta valuty? Pieršyja simptomy taho valutnaha kryzisu jość. U mnohich bankach dalary i jeŭra ŭžo raskuplenyja.
Achvotnyja nabyć valutu čakajuć na ŭvachodzie ŭ abmieńniki tych, chto zdaje dalary, a paśla adrazu ž vykuplajuć ich.
Simvałam stajańnia «pa valutu» ŭ 2011-m staŭ čyhunačny vakzał — čarha ŭ rekordnyja časy naličvała da 1000 čałaviek, jakija musili niekalki razoŭ na dzień paćviardžać svajo miesca ŭ śpisie. Čamu mienavita vakzał? Pa-pieršaje, tam byŭ spadzieŭ na zamiežnikaŭ, jakija kuplali biełaruskija rubli. Pa-druhoje, umovy čakańnia byli davoli kamfortnyja — u ciaple i śviatle.
Noč na 19 śniežnia 2014 hoda biełarusy znoŭ sustrakajuć na vakzale. Čerhi pakul adnosna nievialikija, apoŭnačy valutu čakali niekalki dziasiatkaŭ čałaviek.
Kala kožnaha z abmieńnikaŭ «Biełarusbanka» na padziemnym paviersie stajała pa 5 čałaviek, naviersie, kala «MTBanka», «BPS-Śbierbanka» (tut, pa čutkach, valuta była ŭ prodažy) i «dalokaha» «Biełarusbanka» možna naličyć jašče kala 20 čałaviek. Narešcie, kala dziasiatka piensijaniery zaniali padychody da vialikaha adździaleńnia «Biełarusbanka».
Aficyjny kurs Nacbanka na 19 śniežnia — 10890 rubloŭ za dalar. Achvotniki spadziajucca kupić amierykanskuju valutu pa 11490 rubloŭ, na 5,5% daražej.
