Alaksandr Łukašenka ličyć situacyju z abmiežavańniem pastavak biełaruskich praduktaŭ charčavańnia ŭ Rasiju vynikam palityki.
Ab hetym jon zajaviŭ siońnia, adkazvajučy na pytańni žurnalistaŭ pry naviedvańni Dziaržaŭnaha kamiteta sudovych ekśpiertyz.
«Ale chiba možna zmahacca siońnia z rostam cen i zabaraniać pastaŭki hetaj ža pradukcyi na ŭłasny rynak? Čym bolš pradukcyi, tym nižejšyja ceny. Navošta zabaraniać? - adznačyŭ Alaksandr Łukašenka. — Absalutnaja palityka, prytym durnaja i biazmozhłaja (Absolutnaja politika, pritom hłupaja i biezmozhłaja)».
On nahadaŭ, što na biełaruskija pradpryjemstvy byli zaprošany pradstaŭniki rasijskich vieterynarnych i sanitarnych słužbaŭ. «Nas paprakajuć u čym? Dzieści ź niejkaha pradpryjemstva ŭziali probu, daśledavali jaje — nieprydatnaja. Pa-pieršaje, daśledavać možna tavar pry vytvorčaści i pahruzcy. Kali łaska, prychodźcie, voś vytvorčaść — daśledujcie, pradjaŭlajcie pretenzii. Hetaha nie było. Pahruzka, vaźmicie lubuju partyju, kali jana idzie na Rasiju, daśledujcie, pradjavicie pretenzii.
Dzie daśledavali, jak daśledavali — nie zrazumieła. Tamu my pradjavili pretenzii: tak być nie pavinna», — skazaŭ biełaruski lidar.
Jon dadaŭ, što viedaje pazicyju rasijskich śpiecyjalistaŭ. «Padvioŭšy rysu pad ich zaklučeńniami, možna skazać: čaho ad biełarusaŭ chočam? Daj boh, kab u Rasii było na takim uzroŭni, jak u ich. Heta vielmi vysoki suśvietny ŭzrovień, — adznačyŭ Łukašenka. — Kali treba, ja mahu hetyja fakty pakłaści na stoł. Heta značyć, tyja śpiecyjalisty, jakija pryjechali ad hetaha samaha Dankvierta, byli ŭražany, kažuć, nie mohuć biełarusam pradjavić pretenzii. Tak, jość rabočyja momanty, niedapracoŭki, jak i ŭ inšych pradpryjemstvaŭ. Voś było ich zaklučeńnie. I na nastupny dzień praktyčna ŭsie pradpryjemstvy atrymali dostup na rasijski rynak».
«Łabizm, nieprystojny z boku asobnych struktur. Tych, chto małako pierapracoŭvaje, miasa, kab na hetym zarabić, asabliva napiaredadni Novaha hoda. Ale pakolki tyja, chto łabiruje, praktyčna źviazany z kimści naviersie, heta maje miesca», - skazaŭ biełaruski lidar.
«Plus palityka. Absalutna pierakanany, što heta i jość palityka. Voś my ŭviali sankcyi, a tut voś biełarusy da ich nie dałučylisia.
Dyk my i nie abiacali, što dałučymsia. Što ž my — dałučymsia da sankcyj, kali siońnia ad abvału na rasijskim rynku ich rubla kala miljarda dołaraŭ stracili. Litaralna za hety pramiežak času. Kali b my nie stracili hetu valutu, nam siońnia było b značna lahčej», — adznačyŭ Łukašenka.
«Kali my ŭviadziom sankcyi, jak Rasija, my naohuł hołymi zastaniemsia.
I potym nas nichto nie prasiŭ pa-ludsku: słuchajcie, davajcie vy dałučyciesia da sankcyj, a my vam dapamožam, kali vy štości stracicie. Takoj razmovy nie było. Voś uziali i ŭviali, takim čynam, na škodu sabie i na škodu nam hetyja abmiežavańni», — skazaŭ kiraŭnik dziaržavy.
Alaksandr Łukašenka adznačyŭ, što ŭ suviazi z hetym jon pavinien zadać pramoje pytańnie prezidentu Rasii Uładzimiru Pucinu: čaho kiraŭnictva Rasii choča ad Biełarusi, čamu takija kroki prymajucca, što staić za hetymi krokami? «Toje, što ja skazaŭ, — heta ja miarkuju, i mianie ciažka ŭ hetym pierakanać, ale, moža, u prezidenta i premjera, kiraŭnictva Rasii jość niejkija inšyja tajnyja pryčyny.
Ja čałaviek adkryty i razumieju, kali pytańnie staviać rubam adkryta. My ž svaje ludzi, my ž braty, čaho skryvać adzin ad adnaho! Kali štości treba, ty skažy adkryta. Jak heta ja zaŭsiody rablu. Mnie ciažka — ja kažu: słuchaj, treba voś tut padtrymać, kali možaš, dapamažy. U nas niedzie dobra — davaj padzielimsia. Ja voś takuju palityku prymaju — sumlennuju, adkrytuju, nie brudnuju», — adznačyŭ kiraŭnik dziaržavy. Jon dadaŭ, što ŭ hetym klučy chacieŭ by pahavaryć z prezidentami Rasii i Kazachstana.
«U nas adbudziecca, ja liču, vielmi surjozny ŭ hetym płanie dyjałoh. My nie pavinny zahubić toje ŭtvareńnie, jakomu my pryśviacili niamała hadoŭ. Tamu što my ŭtroch vypakutavali hety sajuz, jaki pačynaje pracavać z 1 studzienia, i budzie hańba nam, kali my ŭłasnymi rukami jaho zahubim. Praciŭnikaŭ, navat pa hetych voś zabaronach, u našaha sajuza vielmi šmat. Asabliva ŭ Rasii. Budziem spadziavacca na lepšaje», — padkreśliŭ Łukašenka.
