Fota pn14.info
Kiraŭnik Čačenskaj Respubliki Ramzan Kadyraŭ pavinšavaŭ ŭ Instagram Alaksandra Załdastanava (bajkiera Chirurha, lidara bajk-kłuba «Načnyja vaŭki») z uklučeńniem u sankcyjny śpis ZŠA.
«Saša, ja ad usiaho serca vinšuju ciabie z vyklučna pryjemnaj navinoj! Navat kali ZŠA vydaduć miljon śpisaŭ, my z taboj svajho mierkavańnia nakont Kryma i Małarosii i, tym bolš, nakont ZŠA nie źmienim!» — napisaŭ jon.
Na dumku Kadyrava, padobny krok z boku ZŠA tolki paćviardžaje toj fakt, što Alaksandr Załdastanaŭ źjaŭlajecca «sapraŭdnym patryjotam».
ZŠA, ES i Kanada u suviazi z padziejami va Ukrainie ŭviali sankcyi ŭ dačynieńni šerahu rasiejskich palitykaŭ, pradprymalnikaŭ i kampanij. Sankcyjnyja śpisy nieadnarazova pašyralisia i dapaŭnialisia.
Sam Chirurh rastłumačyŭ, što abmiežavańni zakranuli jaho nie z-za biźniesu. «My ŭsie vydatna razumiejem, što
viartańnie Sievastopala pačałosia z 2009 hoda, kali prezident uručyŭ mnie ściah dziaržavy i padpisaŭ kartu maršrutu, paśla hetaha my rušyli ŭ Sievastopal na pieršaje patryjatyčnaje bajk-šoŭ.
Paśla my kožny hod tudy jeździli, kab padtrymać ruskich ludziej», — cytuje Załdostanova lenta.ru.
U žniŭni Ramzan Kadyraŭ staŭ členam bajk-kłuba «Načnyja vaŭki» paviedamlaŭ ria.ru.
«Načnyja vaŭki» zrabili tady marš-kidok praz usie rehijony Paŭnočnaha Kaŭkaza. Rezidencyju kiraŭnika Čačni bajkiery naviedali pa asabistym zaprašeńni Kadyrava.
«Mianie vielmi kranuła, jak jon lubić Rasiju. Akramia taho, u jaho taksama šmat matacykłaŭ, i jeździć jon na takim ža, što i ja», — zajaviŭ Chirurh.