«Vyjaŭlenyja adzinkavyja vypadki, -- raskazała Tut.by kiraŭnica Nacyjanalnaha centra hrypu Natalla Hrybkova. — Heta pakul nie epidemija, panikavać nie varta».
Kolkaść zachvorvańniaŭ na VRVI — na ŭzroŭni minułaha hoda, adznačaje zahadčyca adździaleńnia imunaprafiłaktyki DU «Respublikanski centr hihijeny, epidemijałohii i hramadskaha zdaroŭja» Natalla Šmialova.
41% biełarusaŭ pryščeplenyja suprać hrypu hetaj vosieńniu. Vakcyna ratuje nie ad usich vidaŭ hrypu. Ale ŭ pryščeplenych mienšaja imaviernaść pierakryžavanaha zaražeńnia (niekalkimi štamami adnačasova), što źnižaje mahčymaść ciažkich nastupstvaŭ — špitalizacyi i śmierci.
U centrach kantrolu i prafiłaktyki zachvorvańniaŭ ZŠA (The United States Centers for Disease Control and Prevention (CDC) rekamiendujuć dla lačeńnia abo prafiłaktyki hrypu vykarystoŭvać antyvirusnyja preparaty — azieltamivir («Tamiflu») i zanamivir (Relenza).
U 2009 hodzie daśledčyki praviarali efiektyŭnaść biełaruskaha supraćvirusnaha srodku «Fłustop». «Jon nie sastupaŭ preparatu «Tamiflu» i paśpiachova vykarystoŭvajecca našymi śpiecyjalistami», — kaža Natalla Hrybkova.
A voś da «Remantadynu» virus hrypu nabyŭ ustojlivaść. I choć u aptekach preparat da hetaha času pradajecca, u baraćbie z raspaŭsiudžanymi štamami jon praktyčna nie efiektyŭny.
U toj hod śpiecyjalisty taksama vyvučyli biełaruski preparat «Arpietoł» i polski «Hroprynasin». Abodva pakazali słabavyražany supraćvirusny efiekt. «Asnoŭnaja nakiravanaść hetych lekaŭ — vypracoŭka interfieronu (białki, jakija vydzialajucca kletkami čałaviečaha arhanizma ŭ adkaz na ŭvarvańnie virusa)», — kaža Natalla Hrybkova.
«Arpietoł» i «Hroprynasin» možna prymać i ŭ metach prafiłaktyki: pryvykańnia da ich nie pavinna raźvicca, ličyć śpiecyjalist. «A «Tamiflu» i «Fłustop» naležyć pryznačać lekaru, — adznačaje Natalla Hrybkova. - Čamu da «Remantadynu» mnohija štamy rezistentnyja? Tamu što doŭhija hady jon svabodna pradajecca ŭ aptecy, i ludzi časta prymali jaho bieskantrolna».
