 Dančyk |
Dančyk (Bahdan Andrusišyn) naradziŭsia, vučyŭsia i pražyŭ bolšuju častku žyćcia ŭ Ńju‑Jorku. Jahony baćka Paŭło — ukrainiec, a maci Julija — biełaruska. Ź dziacinstva Dančyk vydatna viedaje i biełaruskuju, i ŭkrainskuju movy. Kali jamu było 16 hod, jon trapiŭ na kancert «Pieśniaroŭ», — ansambl hastralavaŭ u Amerycy. A ŭžo praz hod Dančyk zapisaŭ svoj pieršy albom, jaki staŭsia pieršaj biełaruskaj kružełkaj u ZŠA. «Biełarusačka» była zapisanaja ŭ 1977 hodzie ŭ ZŠA i vydadzienaja na kampakt‑dysku praz 30 hod ŭ Miensku. Paśla Dančyk zapisaŭ jašče piać albomaŭ.
Apošni albom, «Kaladnyja pieśni», zapisany Dančykam u 1997 hodzie, paśla apošniaha kancerta ŭ Amerycy, kali jon zajaviŭ, što spyniaje svaju muzyčnuju karjeru. Asnoŭnym zaniatkam Dančyka stała žurnalistyka.
Ciapier «Biełaruskaja muzyčnaja alternatyva» raspačała ŭ Biełarusi pieravydańnie na kampakt‑dyskach usich albomaŭ Dančyka — niadaŭna, 19 śniežnia 2007 hodu, u mienskaj siadzibie BNF prezentavalisia adrazu try kampakt‑dyski Dančyka.
Kiraŭnik prajektu Vital Supranovič i muzykaznaŭca Vitaŭt Martynienka dapoŭnili i ŭdakładnili vydańnie dyskahrafii Dančyka, adšukali i dadali albom ukrainskich piesień u jahonym vykanańni. U adzin z dyskaŭ uvajšoŭ i dakumentalny film «Dančyk», źniaty «Biełaruśfilmam» padčas pryjezdu śpievaka ŭ Biełaruś u 1989 hodzie.
Słuchačy Dančyka viedajuć, słuchajuć, lubiać i čakajuć z novymi kancertami.
Muzyčny krytyk ź Miensku Źmicier Padbiareski paviedamiŭ, što pradstaŭniki muzyčna‑klubnaj sfery Biełarusi ŭžo źviartalisia da jaho z surjoznymi zapytami adnosna mahčymych kancertaŭ Dančyka, i navat vydatnyja biełaruskija hitarysty, jakija mahli b padyhrać śpiavaku, užo vyznačanyja.
«Dobra było b, kab Dančyk pryjechaŭ z kancertam — heta było b prosta kłasna», — kaža Źmicier Padbiarezki.
