 Anatol Labiedźka |
Kiraŭniku Abjadnanaj hramadzianskaj partyi zabaronieny vyjezd za miažu. Apaviaščeńnie pra heta Anatol Labiedźka atrymaŭ 1 studzienia. Padzabytaja sprava (paklop na prezydenta Biełarusi) była adkryta ŭ 2004 hodzie. Jaje najaŭnaść try hady nie zaminała palityku vyjaždžać. Raniej takija nakaty na apazycyju papiaredničali vialikim palityčnym kampanijam.
Lider AHP Anatol Labiedźka 1 studzienia 2008 hoda atrymaŭ apaviaščeńnie z Adździeła pa hramadzianstvie i mihracyi Centralnaha RUUS Mienska, u jakim paviedamlajecca, što jamu zabaronienaje vyjazdžać za miažu.
Rašeńnie było pryniataje na padstavie taho, što ŭ dačynieńni staršyni Abjadnanaj hramadzianskaj partyi Mienskaj haradskoj prakuraturaj uzbudžanaja kryminalnaja sprava pa art. 367 č.2 KK (paklop na prezydenta).
Taksama Anatol Labiedźka atrymaŭ pozvu z prakuratury, dzie havorycca, što prakuratura razhladaje palityka padazravanym, adnak miera spynieńnia nie abirałasia, a abvinavačvańnie nie było pradjaŭlenaje.
«Ciapier vytvorčaść papiaredniaha śledstva pa dadzienaj kryminalnaj spravie prypynienaja na padstavie p.5 č.1 art.246 KPK RB, u suviazi ź niemahčymaściu vytvorčaści śledčych dziejańniaŭ. Padstavaj dla pryniaćcia rašeńnia pasłužyła nievykanańnie pravaachoŭnymi orhanami Rasiejskaj Fiederacyi ŭzbudžanaha prakuraturaj horada Mienska chadajnictva ab akazańni pravavoj dapamohi», — paviedamlajecca ŭ liście prakuratury, jakoje cytuje telegraf.by.
Anatol Labiedźka zajaviŭ, što jamu zabaranili vyjazdžać za miažu pa palityčnych matyvach.
«Palityčnyja nitki tyrčać u kožnym radku adkazaŭ, atrymanych mnoj z prakuratury i adździeła pa hramadzianstvie i mihracyi. Treba nazyvać rečy svaimi imionami, a nie chavacca za farmuloŭkami, pazbaŭlenyja nie tolki pravavoha źmiestu, ale i ŭsialakaha sensu. MUS kivaje ŭ bok prakuratury, taja spasyłajecca na toje, što Rasieja nie vykonvaje svaje abaviazalnictvy ab akazańni pravavoj dapamohi, — ličyć palityk. — Da taho ž prakuratura piśmova pryznaje, što niama nijakich pravavych padstaŭ abmiažoŭvać majo kanstytucyjnaje prava na svabodnaje pieramiaščeńnie».
Raniej ni pra jakuju spravu suprać Labiedźki viadoma nie było. Akazałasia, taja padzabytaja sprava była adkryta ŭ 2004 hodzie (paklop u dačynieńni da prezidenta Biełarusi) paśla intervju A.Labiedźki prahramie "Zierkało" (telekanał "Rasija") i publikacyi ŭ haziecie "Narodnaja vola" ab cieniavym biudžecie ŭ Biełarusi i prodažach zbroi. Dahetul jaje najaŭnaść try hady nie zaminała A. Labiedźku vyjazdžać za miažu i viartacca.
Źviartaje na siabie ŭvahu, što apaviaščeńnie Labiedźku amal supała ŭ časie z namieram Ministerstva justycyi likvidavać Partyju kamunistaŭ. Za dva dni da taho A. Łukašenka vystupiŭ z rezkimi zajavami na adras ZŠA, a pierad tym byŭ padoŭžany termin źniavoleńnia Artura Fińkieviča.
Raniej takija nakaty na apazicyju papiaredničali vialikim palityčnym kampanijam. Ci vybary, pryznačanyja na vosień, dastatkovaja nahoda dla hetaha? Ci nia buduć jany spałučanyja z refierendumam? Mikałaj Čarhiniec učora zajaviŭ, što refierendum pa Kanstytucyjnym akcie sajuznaj dziaržavy maje ŭsie šancy adbycca da kanca 2008 hodu. Padpisańnie takoha aktu, navat z vychałaščanym tekstam, napeŭna, harantavała b novyja finansavyja ŭlivańni Rasiei dla administracyi A. Łukašenki, a tamu takoha varyjantu niamožna vyklučać.
Što da zabarony na vyjezd za miažu dla dziejačoŭ apazicyi, to čas pakaža, budzie heta adzinočnaja ci masavaja miera.
* * *
«Naša Niva»: Što za historyja z kryminalnymi spravami i admovaj Vam u vyjeździe za miažu?
Anatol Labiedźka: Sprava ŭ tym, što ŭ sakaviku 2004 hodu Hieneralnaja prakuratura zaviała na mianie dźvie kryminalnyja spravy pa fakcie abrazy honaru i hodnaści Łukašenki. Spravy byli zaviedzienyja pa fakcie majho interviju rasiejskamu telekanału RTR, a taksama artykułu ŭ «Narodnaj voli», dzie byli maje vykazvańni pra cieniavy biudžet, a taksama pra handal zbrojaj. Niekalki miesiacaŭ ja, jak na pracu, chadziŭ da śledčaha ŭ haradzkuju prakuraturu. Padałosia, što ja pradstaviŭ śledčamu ŭsie dokazy, što maje słovy całkam hruntujucca na zajavach A. Łukašenki ŭ ŚMI. Bolej mianie pa hetych spravach nie turbavali, ale jaje nie spynili. Mnie jana absalutna nijak nie zaminała ŭ pracy. Za hety čas ja paśpieŭ pamianiać try zamiežnyja pašparty i nijakich prablem nie było.
«NN»: A kali daviedali pra novy pavarot u hetaj spravie?
AŁ: U pačatku listapada ja zdaŭ dakumenty dla atrymańnia novaha pašpartu. Zapłaciŭ hrošy za dazvolny štamp na vyjezd za miažu na dva hady, bo tady jašče nijakaj peŭnaści ci admieniać jaho nie było. Mnie skazali, što nijakich prablem nia budzie i praz dva tydni ja zmahu atrymać jaho nazad. Praŭda, paśla pačali ciahnuć z vydačaj. 10 śniežnia, kali ja viarnuŭsia z Vašynhtonu, mnie paviedamili, što dazvolny štamp pastavić nia mohuć, bo na mianie ŭ 2004 hodzie raspačataja kryminalnaja sprava.
«NN»: A tyja kryminalnyja spravy nia mohuć atrymać novaje dychańnie?
AŁ: Naŭrad ci. Kali ja apošni raz viartaŭsia z-za miažy, to znajomyja pamiežniki mnie paviedamili, što ja jość u śpisach nievyjaznych. Što ž, budu palityčnym nievyjaznym № 1. Pierakanany, što nievyjaznych budzie šmat. Navat nie dziesiatki čałaviek. Upieršyniu ŭłady pačali parušać artykuł 30 Kanstytucyi, jaki harantuje hramadzianam bieśpieraškodnaje pieramiaščeńnie. Jość pieršy precedent.
«NN»: Paśla hetaj zabarony ŭ Vas nie zryvajucca niejkija zamiežnyja pajezdki?
AŁ: U mianie ŭžo sarvałasia sustreča ŭ litoŭskim Sojmie. Na ščaście, sučasnyja srodki kamunikacyi dazvalajuć mnie kantaktavać z zamiežnymi partnerami navat nie vychodziačy z ofisu. Ja nie adzin, tamu za miažu budziem adpraŭlać inšych siabroŭ partyi ci siabroŭ ADS.
«NN»: Jak źbirajeciesia zmahacca z hetym rašeńniem?
AŁ: Samaje cikavaje, što hetuju pastanovu nielha abskardžvać u sudovym paradku. Pastarajusia zrabić niejki svoj uniosak u pieramovy, jakija viaducca miž Mienskam i Bruselem ab palapšeńni adnosin. Budu rabić usio, što ad mianie zaležyć. Mnie padajecca, što prysud žorstki Fińkieviču, źbićcio Chviedaruka, zajavy ab likvidacyi PKB, admova mnie ŭ vyjezdach za miažu mohuć być źvionami adnaho łancuha. U atačeńni idzie baraćba miž hrupoŭkami, tych, chto choča liberalizacyi i tych, chto choča praciahnuć siońniašni kurs. Pa ŭsim bačna, što pieramahajuć apošnija, da jakich schilajecca i sam Łukašenka. Razam z tym, heta daje nam dakładny prahnoz na 2008 hod. Ci heta budzie hodam adlihi, ci hodam biezzakońnia.
Hutaryŭ Źmicier Pankaviec
