«Z metaj zabieśpiačeńnia biaśpieki ruchu» Ukrainskaja čyhunka z 27 śniežnia abmiažoŭvaje maršrut ruchu ciahnikoŭ krymskaha napramku da stancyj Novaalaksiejeŭka i Chierson.
U miežach hetaha rašeńnia admianiajucca try mižnarodnyja ciahniki, u tym liku № 100/99 Minsk — Simfieropal z pryčapnymi vahonami Sumy — Simfieropal. Ź Minska ciahnik pierastanie kursiravać 27 śniežnia, ź Simfieropala — 28 śniežnia.
«Pasažyram, jakija admoviacca ad pajezdki, hrošy buduć viernutyja ŭ poŭnym abjomie na stancyjach adpraŭleńnia ciahnikoŭ… Taksama pasažyry zmohuć viarnuć hrošy za adlehłaść, jakuju jany nie prajechali. Dla hetaha nieabchodna źviarnucca ŭ čyhunačnuju kasu stancyi vysadki/pasadki, dzie na bilecie budzie pastaŭlena śpiecyjalnaja adznaka. Paśla hetaha pasažyr pavinien napisać pretenzijny list u adras pasažyrskaj słužby čyhunki, da jakoha prykłaści aryhinał prajaznoha dakumienta z adznakaj i paznačyć całkam proźvišča, imia i imia pa baćku, adras i pašpartnyja źviestki pasažyra. Hrošy buduć viernutyja pieravodam», — havorycca ŭ paviedamleńni Ukrainskaj čyhunki.
Aprača taho, 26 śniežnia ŭviedziena ŭ dziejańnie kanviencyja ab zabaronie pieravozki čyhunačnym transpartam lubych hruzaŭ pamiž macierykovaj častkaj Ukrainy i Krymam.
Raniej pradstaŭniki ŭkrainskich uładaŭ nieadnarazova zajaŭlali, što ciahniki krymskaha napramku mohuć vykarystoŭvacca dla nielehalnaj pieravozki zabaronienych hruzaŭ, uklučajučy zbroju, z anieksavanaha Rasijaj paŭvostrava na macierykovuju Ukrainu.
