U pasieliščach Mienščyny ŭ 2008 hodzie planujecca ŭvieści padatak z prodažaŭ tavaraŭ u razdrobavym handli, na pasłuhi, za parkoŭku, na abnaŭleńnie hramadzkaha transpartu, a taksama spahaniać hrošy za vałodańnie sabakam.
Abłasnyja ŭłady prydumali‑taki mahčymaść papaŭnieńnia biudžetu za košt žycharoŭ Mienščyny. Treba pryznacca, heta nie ŭpieršyniu: kožnaje sklikańnie abłasnoha savietu deputataŭ sama pierš uvodziła padatak z prodažaŭ u razdrobavym handli. Staŭki tradycyjnyja i nie źmianiajucca ŭžo trynaccaty hod: 5% vyručki ad realizacyi tavaraŭ.
Aproč taho, na abłasnym uzroŭni miarkujecca ŭvieści taksama padatak na pasłuhi ŭ pamiery 10% vyručki ad realizacyi.
Planujecca ŭvieści zbor z narychtoŭščykaŭ u pamiery 5% padatkavaj bazy.
Abłasny saviet deputataŭ u pošukach «unutranych rezervaŭ» źbirajecca ŭstalavać zbory za parkoŭku (stajanku) transpartnych srodkaŭ u specyjalna abstalavanych miescach, za vałodańnie sabakami j vykarystańnie ich u pradprymalnickaj dziejnaści.
Taksama abłasnyja abrancy narodu planujuć uvieści metavy zbor na utrymańnie i raźvićcio infrastruktury ŭ pamiery 1% ad prybytku, jaki zastajecca ŭ rasparadžeńni pradpryjemstva, a taksama metavy transpartny zbor na abnaŭleńnie j adnaŭleńnie transpartu ahulnaha karystańnia, jaki vykarystoŭvajecca na maršrutach u haradzkich pasažyrskich, pryharadnych i mižharodnich aŭtobusnych znosinach (2% ad prybytku).
Zazirnuŭšy ŭ kašalki žycharoŭ Mienskaj vobłaści, vertykalščyki j deputaty papoŭniać dziaržaŭny skarb na 642,5 miljardaŭ rubloŭ.