 |
Jak paviedamiŭ BiełaPAN načalnik adździeła transpartu, kamunikacyj i ekałohii Homielskaha harvykankama Viačasłaŭ Piatroŭ, jon źviazvaje hetuju prablemu ź pieraafarmleńniem uładalnikaŭ taksi — indyvidualnych pradprymalnikaŭ u jurydyčnyja asoby.
«Našy ludzi zaŭsiody čakajuć da apošniaha. Voś i pradprymalniki spadziavalisia, što da ŭkaza prezidenta № 760 u apošni momant źjaviacca niejkija palohki, ale hetaha nie adbyłosia. Tamu častka «maršrutčykaŭ» ciapier znachodzicca na stadyi pieraafarmleńnia dakumientaŭ, jašče častka — niezrazumieła na jakoj stadyi. Ale da lutaha situacyja pavinna pryjści ŭ normu», — ličyć V.Piatroŭ.
Načalnik adździeła transpartu taksama paviedamiŭ, što 23 studzienia płanujecca pravieści konkurs na miescy vyzvalenych maršrutaŭ. Jon nie vyklučaje, što ŭ najbližejšy čas niekatoryja maršruty nievysokaj rentabielnaści naohuł pierastanuć isnavać.
«Paśla konkursu ŭładalniki taksi ź mienš vyhadnych maršrutaŭ pierabiarucca na bolš vyhadnyja, miescy vyzvalacca. A śviežaha prytoku žadajučych ja nie baču», — prakamientavaŭ V.Piatroŭ.
Tym časam uładalnik adnaho z maršrutnych taksi, jaki nie pažadaŭ nazvacca, paviedamiŭ BiełaPAN, što z novaha hoda sam pracuje za rulom. «Stanavicca jurydyčnaj asobaj mnie niavyhadna. Daviadziecca pracavać za kapiejki i mieć šmat prablem. Pakul važu ludziej sam, ale ŭžo šukaju sabie inšy zaniatak», — skazaŭ jon.
