 |
Telekanał «Biełsat» ad 1 studzienia pačaŭ viaščańnie ŭ kabielnaj sietcy polskaj Hajnaŭki
. Tam žyvie šmat etničnych biełarusaŭ, i, peŭna, biełaruskamoŭnaje telebačańnie budzie im daspadoby. Ale ci zmohuć biełarusy ŭ Biełarusi hladzieć «Biełsat» biez spadarožnikavaj anteny? Ci mahčyma pabačyć niezaležny tielekanał u zvyčajnych kabielnych sietkach?
U Polščy damahčysia ŭklučeńnia biełaruskaha telekanała «Biełsat» moža prosty žychar luboha horada. Tak i adbyłosia ŭ Hajnaŭcy. Voś što raspavioŭ Racyi vykładčyk historyi hajnaŭskaha liceja Jaŭhien Jančuk:
— Heta była inicyjatyva žycharoŭ našaha horada. Jany źviarnulisia da kiraŭnictva kabielnaha apieratara i paprasili ŭklučyć u sietku viaščańnia biełaruskamoŭny telekanał «Biełsat».
Ci mahčyma heta ŭ Biełarusi? Dla taho kab «Biełsat» trapiŭ u śpis kanałaŭ kabielnych sietak, patrebnaja zhoda kiraŭnictva kabielnaha apieratara. Pakul nie budziem čapać ideałahičny składnik. Najpierš Racyja pasprabavała daznacca, jak adbyvajecca adbor taho ci inšaha kanała dla ŭklučeńnia jaho ŭ pakiet viaščańnia. Načalnik adździeła markietynhu samaha papularnaha kabielnaha apieratara — kampanii «Kosmas TV» Alaksandr Karnavuch raspavioŭ pra toje, jak adbyvajecca praces adboru kanała.
— My kožny hod pravodzim apytańnie našych abanientaŭ nakont taho, jakija kanały jany b žadali ŭklučyć u pakiet i jakija kanały jany b chacieli z pakieta prybrać.
Alaksandr Karnavuch tłumačyć, što rašeńnie ab losie kanała ŭ sietcy «Kosmas‑TV» prymajecca z ulikam mierkavańnia abanientaŭ. Ale vynik hałasavańnia hledačoŭ nie źjaŭlajecca kančatkovym. Usio vyrašaje kiraŭnictva kampanii. A voś adkaz na pytańnie ab tym, ci razhladajecca pytańnie ab uklučeńni ŭ pakiety viaščańnia telekanała «Biełsat»:
— Skažu ščyra, my hetaj mahčymaści nie razhladali.
— A ci była zajaŭka ad «Biełsatu»?
— Nie, my pakul ad ich zajaŭki nie atrymlivali.
Pa tłumačeńni Racyja źviarnułasia da dyrektarki «Biełsatu» Ahnieški Ramašeŭskaj. Jana paviedamiła, što bližejšym časam kanał maje namier źviarnucca da kabielnych apierataraŭ z prapanovami ab supracy. Adbudziecca heta paśla skačeńnia testavaha viaščańnia i pačatku paŭnavartasnaha. Ale Ahnieška Ramašeŭska taksama kaža pra prablemy, ź jakimi moža sutyknucca «Biełsat» u hetym pytańni. Kaliści z kabielnych sietak u Hrodnie pad naciskam uładaŭ byli vykinutyja polskija «Prohram pieršy» i «Pałonija», uzhadvaje spadarynia Ramašeŭska:
— Ja navat nie dumaju pra toje, pastaviać ci nie pastaviać nas u prahramu uładalniki kabielnych sietak. Bo budzie ž tak, jak vyrašać centralnyja ŭłady. Heta ž nie volnaja vola kiraŭnictva kabielnaha apieratara.
Kali b kanał zmoh tranślavacca praz kabielnyja sietki ŭ bujnych haradach, to jaho aŭdytoryja zmahła b stać značna bolšaj, čym pry viaščańni praz spadarožnik. U tym, kab biełarusy zmahli bieź pieraškodaŭ atrymlivać niezaležnuju infarmacyju praz «Biełsat», musić być zacikaŭlenaje nie tolki kiraŭnictva kanała. Ci płanujuć palityki rabić niešta, kab «Biełsat» pabačyła jak maha bolš ludziej? Takoje pytańnie Racyja zadała staršyni Partyi BNF Lavonu Barščeŭskamu:
— Ad vas daviedaŭsia pra toje, što «Biełsat» budzie sprabavać prabicca ŭ kabielnyja sietki. Mnie treba azadačyć tych, chto zajmajecca infarmacyjnaj palitykaj u našaj partyi. Kali budzie patreba, to my, biezumoŭna, padtrymajem.
Darečy, ad nastupnaha aŭtorka ŭ efiry «Biełsatu» źjaviacca telesieryjały. Pačniecca viaščańnie novych prahramaŭ. Navinovaja prahrama «Abjektyŭ» pavialičyć svaju prysutnaść u efiry da 5 chvilinaŭ. A prykładna praź miesiac, paśla skančeńnia ramontu studyi, u «Abjektyva» źjavicca paŭnavartasny viadučy. Pakul kamentavańnie videašerahu ŭ hetaj prahramie adbyvajecca pa‑za kadram.
