Abjadnanaja hramadzianskaja partyja pačała farmiravańnie inicyjatyŭnaj hrupy pa vyłučeńni kandydatam u prezidenty na vybarach 2015 hoda palitviaźnia Mikałaja Statkieviča, paviedamiŭ lidar partyi Anatol Labiedźka 6 studzienia na pres-kanfierencyi ŭ Minsku.
Pavodle słoŭ Labiedźki, u inicyjatyŭnuju hrupu aprača jaho ŭvajšli Stanisłaŭ Bahdankievič, Leŭ Marholin, Antanina Kavalova, Viktar Karniajenka, Juryj Chaščavacki, Hary Pahaniajła, Zinaida Bandarenka i inšyja. «Heta niekalki dziasiatkaŭ vip-pierson, jakija svaim prykładam sprabujuć pryciahnuć uvahu da prablemy palitviaźniaŭ u Biełarusi», — skazaŭ Labiedźka.
Palityk zaznačyŭ, što budzie stvorana, «chutčej, hrupa salidarnaści z palitviaźniami, tamu što da zboru podpisaŭ za vyłučeńnie sprava, vidać, nie dojdzie». «Ale my spadziajemsia, što stvareńnie inicyjatyŭnaj hrupy i jaje dziejańni nabliziać vyzvaleńnie Mikałaja Statkieviča», — skazaŭ jon.
Nieabchodna zaznačyć, što kandydatam u prezidenty na vybarach 2015 hoda płanuje vyłučacca i sam Labiedźka.
Statkievič — adziny kandydat u prezidenty Biełarusi na vybarach 2010 hoda, jaki dahetul znachodzicca ŭ źniavoleńni. U mai 2011 hoda sud Leninskaha rajona Minska pryhavaryŭ jaho da šaści hadoŭ pazbaŭleńnia voli pa abvinavačańni ŭ arhanizacyi masavych biesparadkaŭ u dzień prezidenckich vybaraŭ 19 śniežnia 2010-ha. Zaraz palityk adbyvaje pakarańnie ŭ mahiloŭskaj turmie № 4. Jamu nieadnarazova prapanoŭvali napisać prašeńnie ab pamiłavańni na imia Alaksandra Łukašenki, ale Statkievič kateharyčna admaŭlajecca heta zrabić.
