Minułaj nočču kala vioski Zaračanskaja Maładziečanskaha rajona Minskaj vobłaści z rejek syšła cysterna, u jakoj znachodziłasia 57 ton dyzielnaha paliva.
Jak paviedamlaje pres-słužba MNS, čyhunačny sastaŭ z 64 vahonaŭ nakiroŭvaŭsia ź Litvy ŭ Baryspal (Ukraina) i składaŭsia ź dzieviaci cysternaŭ dla pieravozki dyzielnaha paliva.
Da miesca NZ u 23.40 byli nakiravanyja padraździaleńni MNS, u tym liku słužby chimičnaj i radyjacyjnaj abarony. Nichto ŭ vyniku incydentu nie paciarpieŭ, čyhunačnaje pałatno nie paškodžana, raźlivu paliva nie adbyłosia. Padjomnymi kranami čyhunačnaja cysterna była pastaŭlenaja na kołavuju paru i adbuksavanaja ŭ ramontnuju zonu.
Zatrymka ŭ ruchu 12 ciahnikoŭ roznaha pryznačeńnia skłała da šeść z pałovaj hadzin. U 3.52 ruch čyhunačnych sastavaŭ adnoŭleny ŭ štatnym režymie.
Pryčyna schodu kołavaj pary z rejek vyśviatlajecca.
