Narodny deputat Ukrainy Anton Hieraščanka niekalki tydniaŭ tamu prezentavaŭ prajekt pa zbory dadzienych pra separatystaŭ, jaki stvaryła hrupa adnadumcaŭ, kab dapamahčy MUS i SBU. Sajt nazyvajecca «Miratvorac».
Pavodle stanu na 8 studzienia na sajcie sabrana i apracavana infarmacyja pra 9 tysiač imaviernych bajevikoŭ i ich saŭdzielnikaŭ. Jak kažuć stvaralniki, sajt «Miratvorac» narabiŭ niamała šumu ŭ separatysckich kołach. Dziakujučy bazie dadzienych, sabranaj prajektam «Miratvorac», na blok-pastach pry vyjeździe z zony ATA byli zatrymanyja kala 150 terarystaŭ i ich pamahatych.
U bazie sajtu možna pabačyć imiony i fatazdymki mierkavanych bajevikoŭ. Da kožnaha prykładajucca spasyłki, a taksama dadzienyja z sacyjalnych sietak — naprykład, sełfi z aŭtamatami ci zdymki z pola boju.
Chapaje na sajcie i tych, chto pachodzić ź Biełarusi. Adzin ź ich adznačany ŭ katehoryi «teraryst» — Anatol Małčanaŭ, pazyŭny «Sobr». Śćviardžajecca, što jon braŭ udzieł u akupacyi Krymu, za što atrymaŭ medal ad uładaŭ akupavanaj respubliki.
Jašče adzin «teraryst» — Siarhiej Jasiukievič, 1990 hodu naradžeńnia, ź Iŭja. Na jahonym profili «Ŭkantakcie» sapraŭdy šmat fotak u vajskovaj formie z hieorhijeŭskaj stužkaj — jak miarkujecca, ź inšymi bajevikami «DNR»-«ŁNR». Na adnym sa zdymkaŭ, zahružanym u śniežni 2014 hodu, jon źniaty ŭ akupavanym Daniecku.
Alaksiej Fokaŭ, jak adznačajecca na sajcie, vajuje na baku «DNR»-«ŁNR» va Ŭkrainie. Były aktyvist RNIE i bajec marjinahorskaha specnazu publikavaŭ u sacyjalnych sietkach bahata svaich zdymkaŭ, jakija śviedčać pra jaho datyčnaść da padziejaŭ na Danbasie. Akramia taho, na jahonych staronkach źjaviŭsia zaklik: «Idzie vajna ruskich suprać Zachadu… Vaźmi ŭdzieł u hetaj vajnie, kab vajna zaŭtra nie pryjšła ŭ tvoj dom».
Siarod nieterarystaŭ u bazie jość, naprykład, Dźmitry Kardaš z Vaŭkavysku. U śpisie jon adznačany jak «pravakatar i ŭkrainafob». Sapraŭdy, u sacyjalnych sietkach jon pierapoščvaje antyŭkrainskija dopisy z supołak kštałtu «Antymajdan», aktyŭna biare ŭdzieł u dyskusijach pra rasiejska-ŭkrainski kanflikt na baku separatystaŭ.
Ź viadomych asobaŭ u bazie jość zahadčyk karpunktu rasiejskaha telebačańnia Andrej Kačura, uznaharodžany medalom ordena «Za zasłuhi pierad Ajčynaj» «za abjektyŭnaje aśviatleńnie padziejaŭ u Krymie», znakamitaja snajperka z Barysava Natalla Krasoŭskaja, a taksama były aktyvist NBP z Salihorsku Ihar Ščuka.
Dadzienyja źbirali valantery. Miarkujecca, što paśla materyjały sajtu buduć skarystanyja ŭ sudach i stanuć dokazam «raźviazvańnia Pucinym vajny».
Mnohija z «hierojaŭ» prajektu ŭžo pazakryvali svaje akaŭnty ŭ sacyjalnych sietkach, a niekatoryja, jak kažuć stvaralniki, pačali telefanavać na haračuju liniju SBU z pytańniem, jak atrymać harantyi amnistyi ŭ vypadku dobraachvotnaha pierachodu na ŭkrainski bok.
