Ihar Łohvinaŭ, fota Siarhieja Hudzilina.
Siońnia, 9 studzienia, u Ekanamičnym sudzie Minska było vyniesiena rašeńnie pa kniharni «Łohvinaŭ», jakoha (Ihara Łohavinava) vinavacili ŭ prodažy knih bieź licenzii Mininfarmacyi.
Pryniata rašeńnie aštrafavać kniharniu na 30 bazavych vieličyniaŭ (5 młn 400 tys. rubloŭ), a taksama kanfiskavać vyručku z abarotu na sumu 961 młn 251 tys. 353 rubli. Łohvinaŭ śćviardžaje, što heta nie vyručka, a abarot kramy.
Rašeńnie moža być abskardžana ciaham 10 dzion.
Pieršaje pasiadžeńnie 5 studzienia doŭžyłasia kala 50 chvilin. Spravu razhladaŭ sudździa Siarhiej Kułakoŭski. U pieršy dzień pradstaŭnik padatkovaj inśpiekcyi vykazvaŭ svaje pretenzii. Ihar Łohvinaŭ z advakatam davodzili niasłušnaść zaŭvah.
U śniežni ŭ kniharni «łohvinaŬ» raptoŭna źjaviłasia pazapłanavaja padatkovaja pravierka. Pamiaškańnie apiačatali, pravieryli dakumienty. Za vyjaŭlenyja parušeńni vystavili štraf — 961 miljon rubloŭ (na siońnia hetaja suma ŭ dalaravym ekvivalencie źniziłasia na $20 tysiač — prykładna da $65 tysiač). Hetuju sumu i spahaniali praz sud. Hałoŭnaja ž pretenzija padatkovaj — praca bieź licenzii Ministerstva infarmacyi. Takoje novaŭviadzieńnie — licenzija na knižny handal — źjaviłasia sa studzienia 2014 hoda. Łohvinaŭ šeść razoŭ źviartaŭsia pa jaje ŭ ministerstva, ale ŭsio atrymlivaŭ admovu (jašče dvojčy ŭ jaho nie prymali dakumienty). Ciapier dziejańni Mininfarmacyi jon abskardžvaje ŭ Viarchoŭnym Sudzie.
Ihar davodziŭ sudździ, što amal miljard — heta nie prybytak, a suma abarotu. A kniharnia realna pracuje «ŭ nul».
Druhoje sudovaje pasiadžeńnie prachodziła 9 studzienia. Sudździa Kułakoŭski źviarnuŭ uvahu, što zhodna z KoAP, pad prybytkam ad niezakonnaj dziejnaści majecca na ŭvazie ŭsia suma vyručki. Tamu apielacyi Łohvinava nie majuć padstaŭ.
Sudździa cikaviŭsia, čamu Łohvinaŭ nie abskardžvaŭ admovy Ministerstva infarmacyi raniej, a tolki apošniuju. Ihar patłumačyŭ tym, što heta patrabuje dadatkovaha času, pryciahnieńnia pracy śpiecyjalistaŭ. Tamu paličyŭ, što praściej budzie vypravić pretenzii ministerstva.
Ciapier kniharnia aformlena nie na Łohvinava, a na inšuju jurydyčnuju asobu. Ihar spadziajecca, što heta ŭsio-taki dazvolić atrymać licenziju i kniharnia praciahnie pracu.
PUP «Łohvinaŭ» (hetaj jurasobie naležała kniharnia) pahražaŭ štraf u 500 bazavych vieličyń (90 miljonaŭ rubloŭ) z kanfiskacyjaj dachodu, atrymanaha ŭ vyniku takoj dziejnaści, albo biez kanfiskacyi, albo z pazbaŭleńniem prava zajmacca vyznačanaj dziejnaściu. Ciapier, kali pretenzii padatkovaj sudździa Kułakoŭski pryznaŭ abhruntavanymi, da spravy moža padklučycca Departamient finansavych rasśledavańniaŭ.
