vedomosti.ru
Pahrozy «kalarovych revalucyj» dla Rasii nie isnuje, «niahledziačy na toje, što pra heta paviedamlajuć zachodnija ŚMI», a asnoŭnyja prablemy dla krainy tyčacca ekanomiki i źviazanyja z nadzvyčajnaj centralizacyjaj ŭsich śfier žyćcia, u tym liku ekanomiki.
Pra heta były premjer-ministr, akademik RAN Jaŭhien Prymakoŭ zajaviŭ na pasiedžańni «Mierkuryj-kłuba» 13 studzienia. Tekst jaho vystupleńnia apublikavany na sajcie Handlova-pramysłovaj pałaty.
Havoračy ab źniešniepalityčnym kursie krainy, jon zajaviŭ, što ni pra jakuju izalacyju Rasii nie pavinna iści havorka, i Maskva abaviazanaja raźvivać adnosiny z usimi krainami i Zachadu, i Uschodu, niahledziačy na dziejsnyja sankcyi.
Eks-premjer pierakanany, što Rasija pavinna pryznać ukrainski paŭdniovy ŭschod častkaj Ukrainy i mienavita z takich pazicyj vieści pieramovy z ZŠA i Jeŭropaj.
Jon dadaŭ, što Krym i Sievastopal «nie mohuć być raźmiennaj manietaj» u mižnarodnych pieramovach. Rasija, na jaho dumku, pavinna trymać dźviery adkrytymi dla ZŠA i NATA ŭ «supraćdziejańni sapraŭdnym pahrozam čałaviectva — teraryzmu, narkahandlu, razdźmuvańniu kanfliktaŭ». Biez takoha supracoŭnictva Rasija budzie stračanaja jak vialikaja dziaržava, ličyć Prymakoŭ.
U bližejšyja dva hady ŭłady pavinny pravieści realnuju dyviersifikacyju ekanomiki i dać maksimalnuju ekanamičnuju svabodu rehijonam, skazaŭ taksama eks-premjer. Termin u dva hady jon nazvaŭ, tamu što mienavita stolki času Uładzimir Pucin advioŭ na pieraadoleńnie kryzisu, vystupajučy na vialikaj pres-kanfierencyi ŭ śniežni. «Realny fiederalizm» dapamoža znajści vychad z ekanamičnych prablem, ličyć Prymakoŭ.
Na jaho dumku, za bližejšyja dva hady vykanaŭčaja ŭłada abaviazanaja abviaścić ab prajektach realnaha pierachodu ad syravinnaj ekanomiki da ekanomiki z raźvićciom apracoŭčych halin i lohkaj pramysłovaści.
Praciahvajučy temu fiederalizmu, Prymakoŭ zajaviŭ ab nieabchodnaści pierachodu da ahulnahramadzianskaha samavyznačeńnia rasiejskaha nasielnictva, ale adznačyŭ, što niedapuščalna heta rabić praz supraćjipastaŭleńnie ruskaj kultury kultur inšych etničnych hrup.
Zhadaŭšy apošnija terakty ŭ Francyi, jon skazaŭ, što ŭ Rasii nieabchodna «surjoznaje supraćdziejańnie rusafobii, nacyzmu, antysiemityzmu», a taksama «da hetaha varta dadać rašučuju baraćbu z tymi, chto zamachvajecca na relihijnyja kaštoŭnaści musulman».
