Siońnia, 19 studzienia, folk-teatr «Hościca» ładzić kaladny kancert, u jakim vystupiać pradstaŭniki ŭsich pakaleńniaŭ kalektyvu za jahonuju 28-hadovuju historyju.
Śpievaki i piajuchi, skrypačy i dudary, tancorki i tancoŭščyki, laŭreaty i pieramožcy pakažuć lepšyja kalektyŭnyja tvory «Hościcy», prademanstrujuć solnyja šedeŭry. Małaja scena kancertnaj zali «Miensk», na jakoj adbudziecca vystup, budzie azdoblenaja videafrahmentami z raniejšych prahramaŭ folk-teatru.
Stvaralnica i mastackaja kiraŭnička «Hościcy» Łarysa Simakovič kaža, što ŭkłała ŭ padrychtoŭku kancertu nadzvyčajnyja vysiłki, kab prychilniki zmahli adčuć asablivuju asałodu ad talentu jejnych vychavancaŭ.
Tym bolš, što sceničnyja vystupy ich možna pabačyć vielmi redka. «Mahčyma navat, — kaža spadarynia Simakovič, — heta budzie apošni kancert «Hościcy». Na pytańnie čamu, jana z sumam zaznačaje, što mastactva takoha kštałtu ciapier mała zapatrabavanaje publikaj.
Tak što prychilnikam varta paśpiašacca ŭbačyć niepaŭtornuju dzieju, jakuju stvaraje hety ŭnikalny kalektyŭ. A to moža tak i sapraŭdy stacca, što ŭžyvuju «Hościca» bolš nia vyjdzie na scenu, pakinuŭšy pa sabie tolki zapisy.
Niby ŭ praciah minornaha nastroju ŭsprymajecca i nazva aŭdyjodyska, jaki budzie prezentavany ciaham kancertu. «…I kudy što padziełasia?» — rarytetny zbor zapisaŭ śpieŭnaha repertuaru «Hościcy» 1986—2005 hadoŭ. Da jaho prapanujecca adnajmienny buklet z vyjavami ledź nie ŭsich udzielnikaŭ kalektyvu roznych časoŭ.
Sustrakajemsia a 19 hadzinie siońnia, 19 studzienia, u Małoj zale KZ «Minsk».
Kvitki jašče možna nabyć tut.
