Hałoŭny trenier bresckaha «Prybužža» Piatro Chilko ŭznačaliŭ žanočuju nacyjanalnuju zbornuju Biełarusi pa valejbole. Jon źmianiŭ na hetaj pasadzie Viktara Hančarova, jaki pracavaŭ sa zbornaj u 2007-2009 i 2010-2014 hadach.
Novy nastaŭnik žanočaj nacyjanalnaj kamandy raniej treniravaŭ kłuby ŭ Rasii i Azierbajdžanie. Apošnija dva hady Piatro Chilko plonna pracuje z bresckim «Prybužžam». Hety kłub pry davoli ścipłych mahčymaściach u paraŭnańni z kankurentami źjaŭlajecca čempijonam i ŭładalnikam Kubka Biełarusi.
Žanočaja zbornaja ŭ mai biahučaha hoda praviadzie matčy 3-ha, zaklučnaha adboračnaha raŭnda čempijanatu Jeŭropy suprać kamandy Ukrainy. Pa vynikach dźviuch hulniaŭ pieramožca prymie ŭdzieł u finalnaj častcy čempijanatu Jeŭropy, jaki projdzie ŭ hałandskich haradach Raterdam, Ejndchovien i bielhijskich Apieldorn, Antvierpien z 26 vieraśnia pa 4 kastryčnika 2015 hoda.
U vypadku pieramohi nad ukrainkami biełaruski vystupiać u hrupie S razam z kamandami Rasii, Charvatyi, Bałharyi.
Raniej biełaruskaja zbornaja 6 razoŭ prymała ŭdzieł u finalnaj častcy čempijanataŭ Jeŭropy (1993, 1995, 1997, 2007, 2009, 2013). Lepšy vynik — 8-je miesca ŭ 1993 i 1995 hadach. U 2013 biełaruskija valejbalistki pad kiraŭnictvam Viktara Hančarova zaniali 12-je miesca.
Mužčynskaja zbornaja Biełarusi pa valejbole, jakuju ŭznačalvaje Viktar Sidzielnikaŭ, pieraadoleła adboračny raŭnd čempijanatu Jeŭropy i vystupić na kantynientalnym forumie z 9 pa 18 kastryčnika 2015 hoda ŭ Italii i Bałharyi.
